Hemşaredara Şaredarîya Şaristanê Pîlî ya Amedî Serra Bucak, mîyanê tarîxanê 7-10 Tebaxe de Japonya zîyaret kerde û derheqê nê zîyaretî de kombîyayîşê meclisê şaredarîye de zanitişî kerd pare.

Roniştişo hîrêyîn ê kombîyayîşê adetî yê aşma tebaxe yê Meclisê Şaredarîya Şaristanê Pîlî ya Amedî, bînaya xizmetî ya şaredarîye de ame caarkerdene. Endamê meclisî beşdarê kombîyayîşo ke Hemşaredara Şaredarîya Şaristanê Pîlî Serra Bucak serekîya kerde, bîy.

Hemşaredar Serra Bucak, derheqê gêrayîşê xo yê Japonya de ke mîyanê tarîxanê 7-10 Tebaxe de kerd kombîyayîşê meclisî de zanitişî kerd pare.

'Ma Nameyê Şaredarîya Ma û Şaristanê Ma Ser o Pêşkêşî Kerde'

Hemşaredar Bucak îfade kerd ke gêrayîşê Japonya de zaf pêşkêşî û xebatî kerdê û wina qisey kerd: "Senî ke şima zî zanê, hefteyê verî endamê meclisê ma Umut Aytaç reyde, nameyê Şaredarîya Şaristanê Pîlî ya Amedî ser o, seba temsîlkerdişê şaristanê ma, ma şaristanê Hîroşîma û Nagazakî yê Japonya zîyaret kerdî. Nê zîyaretê ma de ma hem beşdarê programê vîrardişê serrgêra 80. ê eştişê bombaya atomî bi Hîroşîma û Nagazakî, hem zî beşdarê Konferansa Pêroyî ya Tora Şaredaranê Seba Haştîye ya ke şaristanê Nagazakî de ameye serûber kerdene, bîme. Şaredarîya Şaristanê Pîlî ya ma teqrîben 15 serrî yo sey endamê Tora Şaredaranê Seba Haştîye xebatanê xo kena. Reyna kombîyayîşo ke 3 rojî dewam kerd de nameyê Şaredarîya Şaristanê Pîlî yê ma û şaristanê ma ser o, ma heqa qiseyî girewte û pêşkêşî kerde. Na pêşkêşîya ma de, ma xebatê cinîyan, ê komelkî, zaf-ziwanî û zaf-kulturî yê ke şaristanê ma de nameyê haştîye ser o kerde, îzah kerdî û naye ra dima zî pêro şaristananê endamê Tora Şaredaranê Seba Haştîye reyde, xebatê hempare ke do aver berîme dayî şinasnayene. Reyna mîyanê yewbîndîyayîşan de zî ma fîrset dî ke xebatanê haştîye  ê welat û şaredarîyanê cîyayan bigoşdarîme. Ma firsetê tecrubeyê înan ra îstîfadekerdîşî dî. Ma soz da yewbînan ke prosesê ameyoxî de, hem şaristanê Nagazakî hem zî ê Hîroşîma reyde taye xebatanê şênberan pîya bikerîme.

Ma Rê Bî Yew Tecrubeyo ke Roşnî Dano Xebatanê Ma 

Hemşaredare Bucak îfade kerd ke zîyaret seba înan yew rumet û xururo pîl o û vat “Ma firset dî ke xebatanê di şaristanan nêzdî ra temaşe bikerîme ke vera dramê merdimîye yo ke 80 serran ra verî qewemîyaybî bêvindertiş xebatê haştîye kerdê mîhraqê xizmetanê herêmî û şaristanî, xebatê haştîye bingehê awankerdişê komelê demokratîk ser o cografyaya xo de kerdê serdest. 

Hemşaredare Bucak îfade kerd ke zîyaretê înan yew tecrubeyo ke do roşn bido pêro xebatanê înan ke bingehê azadî, demokratîkbîyayîş, vurîyayîşê huqûqî ser o rayîr ra benê.

Qiseykerdişê Hemşaredare Bucak ra dima, rojevan ser o ame vinetene û roniştişê meclisî, bi no hewa ame temamkerdene.