Şaredarîya Şaristanê Pîlî ya Amedî, Taxa Gürbeylî ya Licê û Kamişlî ya Pasûrî de vera şîdeto ke cinîyan rê êno kerdene xebata hişyarîye rayîr ra berde.

Serekîya Dayîreyê Xizmetanê Cinîyan û Keyeyan, bi hemkarîya Şaredarîya Licê û Pasûrî, Taxa Gürbeylî ya Qeza Licê û Taxa Kamişlî ya Qeza Pasûrî de cinîyan reyde ameyî têhet û bal anit şîdeto ke cinîyan rê êno kerdene ser.

Mekanîzmayanê Serepirodayîşî Ser O Ame Vinetene

Çarçiwa na xebata de nêtêduştîya cinsîya komelkî, tewirê şîdetî, planê emnîyetî û mekanîzmayanê serepirodayîşî ser o ame vinetene. Cinîyan reyde rayîranê çareyî ser o nirxnayîşî ameyî kerdene û derheqê mekanîzmayanê serepirodayîşî yê pabesteyîya maddeyan de zî zanitişî ameyî parekerdene.