Hemsereka Şaredarîya Bajarê Pîlî ya Dîyarbekirî Serra Bucake, verê serrgêra perwerde û musnayişî ya neweye de, merkezê etudî, kîtapxane û warê kulturî yê ke xebatê tamîr û rojanekerdişê înan dewam kenê, ca de etud kerdî û derheqê xebatan de agahî girewtî.

Şaredarîya Bajarê Pîlî ya Dîyarbekirî, verê serrgêra perwerde û musnayîşî ya neweye de, bi amanco ke seba wendekaran waranê xebatê hîna berdar awan bikera û mekananê kulturî xurt bikera, xebatanê xo dewam kena. Hemsereka Şaredarîya Bajarê Pîlî Serra Bucake, Sur de merkezê etudî yê 5 qatin ê ke tamîratê înan dewam kenê û mekanê ke Mîyanê Warê Cîwîyayîşî yê Sumerparkî de yê û Kîtapxaneya Mehmet Uzunî ca de etud kerdî.

Surî rê yew merkezê etudî yo fonksîyonel

Merkezê etudî yo 5 qatino ke ameyo plan kerdene ke Sur de xizmete bido wendekaran; bi kitabxane, waranê xebata dersî, salonanê etudî yê ferdî û grûbî êno dewlemendkerdene. Çarçiwa xebatanê tamîratî de, goreyê plananê qatanê îlavekerdeyîyan tertibî yenê kerdene. Îzalasyonê awe, seramîk, boyax-siwax, serkê, viraştişê ber-pençerî û îmalatê elektrîk û mekanîkî ameyê temamkerdene û plan beno ke awanî, bêro resnayene bi serra perwerdeyî û musnayîşî ya neweye.

Pêro binawanîye seranser êna newekerdene 

Na çarçewe de, qatê zemînî yo ke merkezê etudî de yo, bi yew dîzaynê zereyî yo modern û tertîbê roşnayî yo ke fonksîyonelî zêde keno, bi hawayêko ke destek bidero motîvasyonê wendekaran do bêro serûberkerdene. Qatê terasî zî bi qismê kulinde û terasê akerdeyî, bi taybetî aşmanê wisar û hamnanî de, sey yew waro ke wendekarî eşkenê tede bîhna xo bigîrê, do bêro xebitnayene. Seba asayîşê şewatî, korîdorî, ber û merdîwanê şewatî do bêrê newekerdiş û goreyê mevzuatî do bêrê serûberkerdene; pêro binawanîya elektrîk û mekanîkî seranser do bêra newe kerdene.

Kîtapxaneyî û warê kulturîyî ênê serrastkerdene

Hemserek Bucake, merkezê etudî yê Surî ke etud kerd, Kîtapxaneya Mehmet Uzunî ya ke Sumerpark de ya û salonê tîyatroyî û warê xebatî yê ke Mîyanê Warê Cîwîyayîşî de yê, zî zîyaret kerdî. Naca de bi xebatanê pawitiş û newekerdişî yê ke tîya de dewam kenê, armanc beno ke mekan, bi hawayêko ke wendekarî û roniştoxê şaristanî, yew muhîtê hîna rehetî de bieşkê kitab biwanê; ders bixebitîyê û beşdarê fealîyetanê kulturîyan bibê, do bêro dîzayn kerdene.

Hemserek Bucake waşt ke xebatî bi lez temam bibê û bêrê resnayene bi serra perwerde û musayîşî ya neweye û bal anit ser ke warê hîna emnîyetdar, modern û ciresayebarî bêrê awan kerdene ke ciwanî bieşkê hîna weş fokusê dersanê xo bibê û piştî biderîyo averşîyayîşê înan ê komelkî.