Programê perwerdeyî yê sazkerdiş û tamîrkerdişê mobîlyayan ke Şaredarîya Amedî ya Şaristanê Girdî seba averşîyayîşê marîfetanê teknîkî yê cinîyan dest pêkerdbî, qedîya.

Perwerdeyê sazkerdiş û tamîrkerdişê mobîlyayan ke hetê Serekîya Daîreya Xizmetanê Cinîyan û Keyeye ra 1ê Temmuze de dest pêkerdbî, Merkezê Cuya Cinîyan ê Koşuyolu yê Qezaya Baglarî de ame rayberdene. Programê pratîkî yê 2 aşman de 7 cinîyan firsend dî ke teknîkanê bingehînan ê montajî, tamîrî û sazkerdişê mobîlyayan bimusê. Cinîyanê ke perwerde ra îstîfade kerd, înan rê belgeya beşdarîye do bêro dayene.

Roja peyêne ya programî de cinîyan îfade kerd ke hem cuya rojane de xo hîna serbest hîs kenê hem zî hetê meslekî ra melumat û marîfetê ke şênê beranê neweyan akerê, girewtî.

'Êdî eke xebata tamîrî vejîyo ez bi xo eşkena bikera'

Kursîyeran ra Bîrsen Duz ke beşdara perwerdeyî bîye, dîyar kerd ke atolye cuya rojane asanêr kena û eke xebatêka tamîrî vejîya êdî a bi xo eşkena bikera. Duz wina va: "Atolye de saya mamosteyan kêmasîyê xo mi temam kerdî. Verê mi keye de kerdêne la kêmasîyê mi est bîyî. Tîya de mi nê kêmasîyî temam kerdî.”