Hemşaredara Şaredarîya Amedî ya Şaristanê Girdî Serra Bucak, 10 wendekarê ke îmtihanê LGS’yî de 500 pûano tam girewt û bîyê yewinê Tirkîya, înan û keyeyanê înan reyde ameye têhet. Her wendekarî rê 20 hezar TL piştîya perwerdeyî ameye dayene.

Serekîya Daîreya Xizmetanê Sosyalan, seba pîrozkerdişê serkewtiş û teşwîqkerdişî Merkezê Kongre û Kulturî yê Çand Amedî de aktîvîteyêk organîze kerd. 10 wendekarê amedijî ke LGS’yî de 500 pûano tam girewt, keyeyanê xo reyde beşdarê aktîvîte bîyî.

Hemşaredare Bucak wendekarê serkewteyî bi nameyê înan wendî ê pîroz kerdî, nameyê wendekaran wina yo: Ali Zerdeşt Yeşîlordek, Bahoz Şerzan Kahraman, Açelya Dagtan, Mona Jîyanda Şengul, Cîvan Şukrî Akay, Alî Emîr Çelîk, Jehat Firat Aslan, Elîf Naz Durap, Omer Arcan û Muhemmed Yûsuf Yîgît. Bucak va: "No serkewtiş tena seba şima nîyo, seba Amedî zî çimeyêko sereberzî yo. Şima do bajarê ma tewr rindek temsîl bikê."

Bucak dîyar kerd ke tayê wendekarî do şêrê bajaranê bînan la ganî kulturê xo, ziwanê xo û bajarê xo vîr ra nêkerê û va: "Nameyê xo yê rindekî û manaya ci xo vîr ra mekerê. Ci zî xo reyde berê cayê ke şima şonê û komelî rê layîq azad, cehd bikerê ke şima bibê demokratîk û  ciwanêko modern."

Aktîvîte de Hemşaredare Bucak, Hemverfekê Meclîsê DBB’yî Demet Ceylan û Ayhan Karatekîn, Hetkara Sekreterê Pêroyî Zerîn Turk pîya her wendekarî rê 20 hezar TL dîyarîya serkewtişî pêşkêş kerde. Wendekar û keyeyanê înan rê kitabî zî ameyî dîyarîkerdene