Şaredarîya Amedî ya Şaristanê Girdî, baxçeyê nebatanê dermanî û aromatîkan ê 14 hezar metrekareyî de ke do keda cinîyan rê bibo çime û 15 tewirê nebatan do tede bêrê ramitene, xebatî lez kerdî.

Serekîyanê Daîreyanê Park û Baxçeyan, Vurînayîşê Îklîmî û Sifir Eşteyî, Xizmetanê Dewan, Pawitişê Cugehî û Kontrolî û Xizmetanê Cinî û Keyeyî pîya projeyê baxçeyê nebatanê dermanî û aromatîkan de ke do hem perwerde hem zî berhemardiş tede bêro kerdene, xebatan danê dewamkerdene.

Baxçeyê ke 14 hezar metrekare ser o do bêro awankerdene, xebatê binawanî (xetê drenajî, tesîsatê awe û ronayîşê kerrayanê sînoran) dewam kenê. Serekîya Daîreya Park û Baxçeyan, hewteyê ameyoxî dea xebatanê binawanî qedênena û dest bi xebatanê sererastkerdişî kena.

15 Tewirê Nebatan Do Bêrê Ramitene

Baxçeyê xususî de ke qezaya Kayapinarî de Serekîya Daîreya Park û Baxçeyan de do bêro viraştene, pêro pîya 15 tewirê nebatan do tede bêrê ramitene.

Cinîyan rê Çimeyê Qezencî

Cinîyî merhelayanê ronayîşê nebatan, berhemardiş, arêdayîş, huşkkerdiş û vurîyayîşê berheman ê berhemanê erjzêdekerdî (berhemanê kozmetîkî yê xozayî) de do ca bigîrê. Şaredarîya Şaristanê Girdî do cinîyan rê derheqê ronayîş, arêdayîş, huşkkerdiş û vurîyayîşê berheman ê berhemanê erjan de perwerdeyê praktîkî bido.

Perwerde û Baxçeyê Resayoxî

Şaredarîya Şaristanê Girdî, cayê peyzajî yê neweyî de ke têkilîya herre û merdimî esas gêno, gede, astengdar, pîr û cinîyan - beşanê komelî yê pêroyînan rê derheqê nebatanê dermanî û aromatîkan de do perwerdeyo pêroyî bido. 

Seba astengdaran û pîran baxçeyê berzkerdeyî do bêrê viraştene. Bi saya nê baxçeyan, astengdarê ortopedîkî û welatijê pîrî do bieşkê nebatanê tewirê cîya-cîyayan nêzdî ra bivînê, dest bidê ci û arê bikerê.