Hemşaredarê Amedî ya Şaristanê Girdî Serra Bucak û Dogan Hatun, beşdarê beyanatê waştişê perwerdeyê ziwanê dayîke bîyî. Hemşaredare Bucak bal ante muhîmîya perwerdeyê ziwanê dayîke ser o û va zarokîstanan ra heta zanîngehan perwerdeyê bi ziwanê dayîke, seba sîstemêko demokratîk û aştîyêka birûmete heqanê tewr meşrûyan ra yew o.

Egîtîm Sen, Komela Cigêrayîşanê Ziwan û Kulturê Mezopotamya (MED-DER) û rêxistinanê sîvîlan ê şaristanî, roja yewine ya serra perwerdeyî ya newîye de seba waştişê perwerdeyê bi ziwanê dayîke qezaya Kayapinarî de vernîya Mudîrîyetê Perwerdeyê Neteweyî yê Şaristanî beyanatê çapemenî da. Beyanatî de Hemşaredarê Amedî ya Şaristanê Girdî Serra Bucak û Dogan Hatun, Hemserekê Şaristanî yê Partîya Seypêyî û Demokrasîya Şaran (DEM Partî) Abbas Şahîn û Gulşen Ozer, hemşaredarê qezayan û temsîlkarê rêxistinanê sîvîlan beşdar bîyî.

Beyanatî de bal ameye antene ser o ke ganî heme şar gedeyanê xo reyde bi ziwanê dayîke qisey bikero û ziwan ganî heme qadanê şarî de bêro ciwîyayene.

Hemşaredare Bucak: Ganî Raştîye Bi Vengêko Berz Bêro Vatene

Hemşaredara Şaredarîya Şaristanê Girdî Serra Bucak, beyanatî de qiseykerdişê xo de bal ante têkoşînê ziwanî yê se serran ê şarê kurdî ser o û wina va: "Teqez seba ma prosesêko muhîm û tarîxî virazîyeno. Têkoşînê se sarran ê şarê kurdî merhelayêka muhîme ya komelkî û sîyasî de, ma reyna mîyanê qiseykerdişê prosesê aştîye de yê. Ewro mamoste û gedeyan rê ke dest bi perwerde-banderîye kenê, ganî na raştîye bi vengêko berzêr bêro vatene. Se serr o vera polîtîkayanê asîmîlasyonî ma asîmîle nêbîyî. Ma ziwanê xo bajaran de musayî û ewro sînema ra heta edebîyat, huner ra heta sîyaset her warî de ganî aver berê. Ziwanê ma tewr kêmî qasê heme ziwananê dinya pîroz o. Waştişê şarê kurdî yê perwerdeyê bi ziwanê dayîke heqêko tewr meşrû yo."

Hemşaredare Bucak behsê averşîyayîşê pedagojîk û keda prosesê komelkî yê perwerdeyê gedeyan ê bi ziwanê dayîke kerd û va: "Belkî înan terk kerdo la ma zanê ke aştîyêka birûmete tena bi hurmetkerdişê heq û huqûqê yewbînan ra vîyarena."

'Ma Pîya Na Rayîrî Roşn Bikerê'

Hemşaredare Bucak bal ante muhîmîya perwerdeyê ziwanê dayîke ya zarokîstanan ra heta zanîngehan ser o û seba sîstemêko perwerdeyî yo demokratîk û aştîyêka birûmete va: "Mîrasê kesanê ke averşîyayîşê nê ziwanî de pêşengî kerda, ewro zî rayîrê ma roşn keno. Bêrê bi toleransê ma yê vera kurdkî pêro pîya ma rayîrê Tirkîya roşn bikerê."