Hemşaredara Şaredarîya Girdî ya Amedî Serra Bucak, Kongreyê UCLG-MEWA 2025î de vat: "Amed de ma cehd kenê ke toximanê aştîye xizmetanê xo yê rojane de şîn bikerê."
Hemşaredara Şaredarîya Girdî ya Amedî Serra Bucak, Kongreyê UCLG-MEWA 2025î de ke Şaredarîya Girdî ya Konya mêmandarî kerde, beşdarê roniştişêk bîye ke sernuşteyê ci "Badê Pêkewtişan Seba Averberdişê Herêmkî Plankerdişê Averşîyayîşî" bî.
Hemşaredar Bucak roniştişî de vat ke dewletanê Rojhelatê Mîyanênî û Asya Rojawanî hema bi krîzanê girsan ê însanîyan hetî ra şinê: "Bi taybetî jenosîdê Gazze de, krîzê sîyasî û ekonomîkî yê Lubnanî ke bi desan serran o nêyenê çarekerdene, şerê dergî yê Sûrîye ke des serran dewam keno û bi milîyonan însanî yenê surgunkerdene.
Bucak vat ke averşîyayîşê badê pêkewtişan tena raştkerdiş û awankerdişê awanîyan yan sîstemanê bingeyinîyan nîyo: "Ganî sey yew wext hem erjanê komelkî hêzdar bikerê hem yew îdareyo domdar temîn bikerê û awan bikerê. Ma eşkenê aştîye awan bikerê - eke ma kom bê, bawerîya yewbînan reyde newe ra aştî bîyarê ca û heq û azadîyê her kesî a pêro bipawê."
Bucak îfade kerd ke îdareyê herêmkî nê prosesî de aktorê bingeyin ê û vat: "Şaredarîya Şaristanê Girdî ya Amedî sey îdareyê ke şarî ra tewr nêzdî yê 12 hezar serreyî de heme kulturî, bawerîyî û nasnameyê cîyayî kom kerdî. Kurdî, tirkî, ermenî, suryanî û zaf şarê bînî tîya reça xo verdaye. Ma wazenê peyê nê rêçan bivejê. Ma sey şaredarîye ferqîya sosyokulturelî, netewe û dînî politîkayanê îdareyê herêmkî de kenê bingeyo xo."
Bucak îfade kerd ke şaredarîya zafziwanîye prensîbêko bingeyin o seba awankerdişê komelêko bi aştîye: "Xizmetan de ma wazenê ke ziwan asteng nêbo. Nimûne, xeta 153î ya merkezê vengdayîşî ma nika bi Kurmancî zî xizmet dana. Şarê ma eşkeno gazin, taleb û pêşnîyazan xo bi ziwanê dayika xo bidê. No zaf muhîm o seba bingeyê bawerîye û eleqedarbîyayîşî. Ma bi Kurmancî dest pêkerd labelê nezdî de Zazakî, Erebkî û Îngilîzkî de zî ma do xizmet bidê. Hedefê ma yo ke însanê nê bajarî sey ke wazenê wina xizmet bigîrê. Çunke ma zanê ke ziwan însanî rê nasname û şeref dano."
