Taximê Futbolî yê Camêrdan ê Şaredarîya Amedî ya Şaristanê Girdî, serra peyêne de serkewtişê xo ra dima, vejîyabî Lîga Amatore ya Herêmkî û amanc keno ke şarê xo bi hewayêko başêr temsîl bikero û vejîyo lîga corêne.
Taximê Futbolî yê Camêrdan ê Şaredarîya Amedî ya Şaristanê Girdî yê ke binê Serekîya Daîreya Xizmetanê Ciwan û Sporî de xebatanê xo domneno, amadekarîyanê serra newîye bi îdmananê di reyan dewam keno. Sporbazî, bi amadekarîyanê giran û zehmetan amanc kenê ke lîge de destpêkerdişêko xurt bikerê.
Grûba BAL’î ya Dîyine
Taximê DBB’yî ke do Lîga Amatore ya Herêmkî (BAL) Grûba Dîyine de kay bikero, grûbe de bi Klûbê Futbolî yê Semsûrî, Aksaray Gençlîkspor, B. Gazi Belediyespor, Diyarbakirspor, Elazıg Yolspor, Kahta 02 Spor, Kocasînan Şîmşekspor, Malatyaspor, On Îkî Şubat Îdmanyurduspor, Onîkîşubat Spor Kulubu, Sîverek Beledîyespor, Şanlıurfa Buyukşehîr Belediyespor, Vîranşehir Beledîyespor reyde kay bikero.
Musabeqaya Yewine 12ê Teşrîna Verêne de
Taximê DBB’yî, maçê xo yo yewin 12ê teşrîna verêne, roja yewşemeyî de, deplasmanê Kocasînan Şîmşeksporî de kay keno.
'Ma wazenê ke seba ciwananê herêma xo xizmet bikerê'
Ahmet Kurt, Berpirsîyarê Teknîkî yê DBB Sporî, ke derheqê amadekarîyanê lîge de agahî da, îfade kerd ke taxim bi motîvasyonêko berz serra newîye rê amade beno. Kurtî va: "Bi piştgirîya ke îdareyê ma ma rê kena, ma amadekarîyanê xo dewam kenê. Na serre, Lîga Amatore ya Herêmkî, goreyê Lîga Amatore ya Supere zafêr giran bibo. Sporbazanê ma ra bawerîya ma est a. Ma wazenê hem seba şarsitan û hem zî seba herêma xo, seba ciwananê xo xizmet bikerê. Amancê ma o yo ke ma bi nê ciwanan kadroyêk awan bikerê û çarçewaya Fair Play de kay bikerê. Ma hêvî kenê na serre de ma amanc kenê ke cayêko başêr de ca bigîrê û vejîyê lîga corêne."
'Ma wazenê şaristanê xo bi hewayêko başêr temsîl bikerê'
Yusuf Kandemir, yew futbolbazê taximî, îfade kerd ke ê bi îdmananê giranan lîge rê amade benê. Kandemir, ke bal ante ser ke o taximî ra zaf hêvîdar o, va: "Îdareyê ma her babete de ma rê piştgirî dana. Nika îdmanê ma çetin yenê kerdene, ma îdmananê di reyan kenê. Netîceyanê eyinîyan ma maçanê amadekarîye de zî vînenê. Kayo ke ma kay kenê, am tira keyf gênê. Ma wazenê ke şaristanê xo bi hewayêko başêr temsîl bikerê. Amed şaristanêko gird o û destekê taraftaran o gird est o. Ma zî do bi hawayêko başêr saha de cawabê nê destekî bidê. Amancê ma şampîyonî ya."
