Roja Xidayan a Dinya de hetê Şaredarîya Amedî ya Şaristanê Girdî ra wendekaran rê werdê biweşîyê ameyî vilakerdene.

Çarçewaya 16ê teşrîna verêne Roja Xidayan a Dinya de seba awankerdişê hişyarîya werdanê biweşîye, Şaredarîya Amedî ya Şaristanê Girdî Parka Koşuyoluyî ya qezaya Baglarî de çalakîyêk organîze kerd.

Çalakî de wendekaran û şarî rê şit û mûze ameyî vilakerdene û muhîmîya resayîşê xidayanê biweşîyan ameye îzahkerdene.

Bi fehmê "hêga ra heta sifreyî"

Serekê Daîreya Karanê Weşîye Vahap Saçaklîyî îfade kerd ke amancê înan tena îzahê muhîmîya weranê biweşîye nîyo, eynî demî de bi xebatanê kontrolê xidayan ke pêroyê serre dewam kenê, bi fehmê "hêga ra heta sifreyî" şiûrê emnîyetê xidayan awan kenê.

Çalakî de sewbîna broşurê ke bal ancenê emnîyetê xidayan ser o, ameyî vilakerdene.