Pêdîyayîşê Herêmkî yê Komîsyonê Seypêyîya Firsendê Cinî û Camêran (KEFEK) yê TBMM'yî Salona Konferansî ya Keyeyê Mamostayan ê Amedî de ame kerdene.

Pêdîyayîşî de Hemşaredara Amedî ya Şaristanê Girdî Serra Bucak qisey kerd û îşaret kerd ke xebatî bi hedefî ke Amed bibo  "bajarê cinîyan"  yenê kerdene û va ke bi projeyan sey tatbîqê JINKART, Zarokistan, Keyeyê Cuya Cinîyan û xizmetê weşîye yê mobîlî yê ziwanê dayîke de beşdarîya cinîyan a komelkî, ekonomîk û cuya komelkî yena piştîdayene.

Sewbîna Hemşaredara Amedî ya Şaristanê Girdî Serra Bucak îfade kerd ke seba ke cinîyî waranê teknîkî de cayê xo bigîrê,  waranê animasyonê 3D, montajê mobîlyan, klîma û kombî de ê kursan organîze kenê û bi naye ê hedef kenê ke qeydeyê cinîbîyayîşî yê komelkî bêrê bedilnayene.