Hemşaredarê Şaredarîya Şaristanê Girdî ya Amedî Serra Bucak û Dogan Hatun, beşdarê "Komxebata Goreyê Çimê Afatan Ravurnayîşê Baglarê Kehenî, Bedilnayîşê Bajarî û Koçberîye" bîyî. 

Komxebate de Hemşaredar Dogan Hatunî qisey kerd û va ke viraştişê qezaya Baglar ser o ganî çareserîyêka winayên bêro kerdene ke şar maxdur nêbo.

Komxebate bi koordînasyonê Şaredarîya Baglarî, hemkarîya Şaredarîya Şaristanê Girdî ya Amedî, Yewîya Şaredarîyanê Herêmê Vakurê Başûrî (GABB) û Heyetê Koordînasyonê Amedî yê Yewîya Odayanê Muhendîs û Mîmaranê Tirkan (TMMOB) reyde Merkezê Kulturî û Kongre yê Çand Amedî de ame organîzekerdene. Komxebate de Hemşaredarê Şaredarîya Şaristanê Girdî Serra Bucak û Dogan Hatun, Hemşaredarê Şaredarîya Baglar Leyla Ayaz û Sîraç Çelîk, hemşaredarê qezayan, Hemsereka Şaristanî ya Amedî ya DEM Partî Gulşen Ozer, temsîlkarê dezgehanê komelê sîvîl û muxtarî beşdar bîyî.

Hemşaredar Hatun: Eke ma pêroyê bajarî ra biewnî ma nêeşkenê Baglarî fehm bikerê

Hemşaredar Hatunî komxebate de qisey kerd û bale ante problemanê plankerdişî yê ke vera ravurnayîşê bajarî dest pêkenê û va: "Ma ganî Amed pêroyî ra biewnîyê. Eke ma pêroyê bajarî ra biewnî ma nêeşkenê Baglarî fehm bikerê."

"Ganî Ma Şarî Maxdur Nêkerê"

Hatunî îfade kerd ke qezaya Baglar de problemê mûlkîyetî zaf gird ê û dewam kerd: "Ganî ma pîya bi şarî, dezgehan û şaredarîyan çareser bikerê ke kes maxdur nêbo. Ma seba naye amade yê. Ma nînan rind zanê. No problem Enqere ra, xerîta ser ra nêyeno çareserkerdene. Ganî plankerdişê çareserîye ca de bêrê viraştene. Ganî ma şarî maxdur nêkerê. Ganî ma Baglar nêkerê cayê rantî. Amanco verên şar maxdur nêbo, viraştişkoê xurt, bajarêko pak û rastkerde yo."

Komxebate do di rojan dewam bikero û derheqê mewzuyanê sey bedilnayîşê bajarî, viraştiş, problemê mûlkîyetî û rolê îdareyanê herêmkî ser o pêşkêşî do bêrê kerdene.