Festîwalê Fîlman ê Amedî yo 3. yo Mîyannetewî ke bi mêmandarîya Şaredarîya Amedî ya Şaristanê Girdî û bi rayberîya Akademîya Sînema ya Rojhelatê Mîyanêne û Sînebîrî yeno organîzekerdene, roja xo ya çarine de bi nîşandayîşê fîlm û xebatanê atolyeyan dewam keno.

Roja çarine de 12 fîlmî temaşekerdoxan reyde ameyî têhet. Merkezê Kultur û Kongre yê Çand Amedî de fîlmê Iraq's Invisible Beauty ke weşîya nêasaye ya Iraqî û cuya binê sîya şerî ra behs keno, fîlmê Baghdad Messî ke Festîwalê Fîlman ê Duhokî de sey fîlmê tewr rindî ame weçînayene û hîkayeya gedeyêkî ke bi futbolî xeyalanê xo xurt keno, û fîlmê The Virgin and Child ke vurîyayîşê bedenê cinîyan ê binê tedaya komelkî ra behs keno, ameyî nîşandayene.

'Temaşekerdoxê Amedî zaf cîya bî'

Produktor û Rêjîsore Ayşe Çetînbaş ke Atolyeya Produktorîya Belgefîlmanê Xoseran daye, va ke temaşekerdoxê Amedî zaf cîya yê. Çetînbaşe ke bi Çayan Demîrel reyde rêjîsorîya belgefîlmê Bira Stranan kerda ke fîlmê akerdişê festîwalî bî, va: "Reaksîyonê temaşekerdoxanê her cayî cîya bî la yê Amedî zaf cîya bî. Bi çepikan ê domdaran nîşandayîşêko hîsdar vîyart."

Çetînbaşe îfade kerd ke temaşekerdoxan vatêne ke qismê Armenîyan ê fîlmî zaf tesîrdar o û ê nêeşkayî hêsirê xo bitepîşê. Çetînbaşe va: "Atmosferek de ke tam sey Amedî lazim bî, wina vîyart."

'Mi tecrubeyê xo pare kerdî'

Çetînbaşe ke va eleqeyê atolyeye gird bî, îfade kerd ke derheqê prosesanê berhemardişê belgefîlmanê xoseran ê Tirkîya de çarçeweyêka hîraye pêşkêş kerda. Çetînbaşe va: "Nê welatî de belgefîlm viraştene çi zehmetîyê xo est ê, çi piştgirîyî eşkenê bêrê girewtene, her çiqas şertanê zehmetan de bibê zî belgefîlm senî eşkeno bêro viraştene — mi tecrubeyê xo pare kerdî."