Festîvalê Fîlman ê Amedî yo 3. yo Mîyannetewî ke do heta 14ê Kanûne dewam bikero, roja xo ya şeşine de bi berhemanê rindan ke hîkayeyê bîyografîkan ra heta belgefîlman, hîkayeyê fantastîkan ra heta vîrê kolektîfî şinê, sînemahesan reyde Merkezê Kulturî û Kongre yê Çand Amedî de ardî têhet.

Fîlman mîyan de; Fanon ke kolonyalîzm û têkoşînê merdimîye ra behs keno, “Bîyayîşê Aurora” ke bi anîmasyon ciwîyayîş û hêvîye ano têhet û Bi Roje Apollon Şewe Athena ke bi hîkayeya fantastîke ya Emîne Yildirîm a, ca girewt.

Sohbetanê ke badê nîşandayîşan ameyî organîzekerdene; tede derheqê rewşanê cinîbîyayîşî, vîrê komelkî, trawma û temaya hêvîye de munaqeşeyê rindî ameyî kerdene.

Festîval, bi hîkayeyanê rindan ê cografyayanê cîyayan ra dewam keno ke temaşekerdoxan reyde bêro têhet.