Hemşaredara Şaredarîya Amedî ya Şaristanê Girdî Serra Bucak, warê cuya xozayî yo ke Yenîşehîr de yeno viraştene û xebatê ke Fabrîkaya Nanê Şarî ya Baglarî de yenê kerdene, cayê xo de etud kerdî.

Hemşaredara Şaredarîya Amedî ya Şaristanê Girdî Serra Bucak, warê cuya xozayî yo newe ke hetê Serekîya Daîreya Karanê Weşîye ra Taxa Yaytaşî ya qezaya Yenîşehîrî de 195 dekarî ser o yeno viraştene, tede etudî kerdî. Hemşaredare Bucak warêko ke nêzdîyê 15 hezar heywanî eşkenê tede bimanê, gêraye û derheqê qonaxa ke xebatî resayî de berpirsîyaran ra agahî girewtî.

'Ganî warê cuya xozayî seba Tirkîya bibo nimûne'

Hemşaredare Bucak etudan de destnîşan kerd ke warê 195 dekarî de nêzdîyê 15 hezar heywanî do bêrê weyekerdene û bal ante ser o ke ganî war wina bibo ke seba Tirkîya bibo nimûne. Bucake ke îfade kerd ke badê temambîyayîşê prosesê hazirkerdişî ganî perwerdeyanê baytarî zî bêrê plankerdene, va ke tetbîqê modelî yê nê warî do bêrê nimûnegirewtene. Hemşaredare Bucak ke derheqê rewşa xebatan de agahî girewtî, waşt ke proses bêro lezkerdene.

Hemşaredare Bucak, xebatkarê ke saha de xebitîyenê înan reyde sohbet kerd û xebatanê înan de rehetî waşt.

Fabrîkaya Nanê Şarî de Etud

Hemşaredare Bucak, badê etudanê warê cuya xozayî, şîye Fabrîkaya Nanê Şarî ke hetê Serekîya Daîreya Karanê Fenî ra Taxa Bagcilarî ya qezaya Baglarî de yena viraştene. Hemşaredare Bucak tesîso bi 4 hezar û 500 metrekare warê girewtî û bi kapasîteyê berhemardişê rojane 100 hezar nanî yeno plankerdene, gêraye û derheqê xebatan de ke yenê kerdene, agahîyê teknîkî girewtî.

Hemşaredare Bucak ke bal ante tetbîqanê weşîya karî û emniyetî ser o, destnîşan kerd ke ganî kontrolê lazimî bi rêze bêrê kerdene û waşt ke xebatî demêko kilm de temam bibê.

Etudan de Sekreterê Pêroyî yê DBB’yî Emrullah Gorduk, Hetkarê Sekreterê Pêroyî Azîz Ozdogan û Serdar Bakiroglu û Endamê Meclîsî Mahmut Yokuş Hemşaredare Bucak reyde bîyî.