Xelatê Musabaqaya Nuştişê Kayan ê Şanoyî yê Kurdkî ya Evdirehîm Rehmî Hekarî, bi merasîmo ke Merkezê Kultur û Kongre yê Çand Amedî de ame kerdene, ameyî eşkerakerdene.
Merasîmê xelatdayîşê Musabaqaya 7. ya Nuştişê Kayan ê Şanoyî yê Kurdkî ya Evdirehîm Rehmî Hekarî ke serra 2016î de ya şeşine ameye kerdene û 9 serran ra dima newe ra ameye organîzekerdene, Merkezê Kultur û Kongre yê Çand Amedî de ame kerdene. Verê merasîmê xelatdayîşî de kayê Şanoyê Şaristanî yê Şaredarîya Amedî ya Şaristanê Girdî (DBŞT) yê bi nameyê "Jîn" ame sahnekerdene. Badê nîşandayîşî, merasîmê xelatdayîşî ke kaybazê şanoyî Omer Şahînî pêşkêş kerd, dest pê kerd.
45 kayî ameyî şawitene
Omer Şahînî ke pêşkêşkerdişî de qisey kerd, destnîşan kerd ke nuştişê kayan ê şanoyî yê Kurdkî de kêmanîyê muhîmî est ê û îfade kerd ke na musabaqe hetê mirdîkerdişê na hewcedarîye ra zaf muhîn bîye. Şahînî va ke musabaqa rê 45 kayî ameyî şawitene û dîyar kerd ke endamê jurîyî Qudbeddîn Sadik, Kawa Şexe, Rugeş Kirici, Şîlane Alagoz û Helket Îdrîsî eserî bi baldarî etud kerdî.
Têkoşîn û mîrasê edebî yê Hekarî
Mudîrê Şanoyî Tahîr Baykuşakî zî waşt ke kultur û huner tim nê salonan de biberiqo. Baykuşakî bal ante muhîmîya têkoşînê Evdirehîm Rehmî Hekarî zî ser o. Baykuşakî ard vîrardene ke Hekarî serra 1890î de Başkale de bîyo, Medreseya Hurhurî ya Wanî de wendişê Seîdê Kurdî girewto û wexto ke ey mamostayî kerdêne, Şerê Dinya yê 1. dest pê kerdo. Baykuşakî qisey kerd ke Hekarî ke şerî de bîyo esîrê Rusan, nê prosesî de eserê xo yê bi nameyê "Zarokekî Dîl" nuşto.
Xelatî ameyî eşkerakerdene
Badê qiseykerdişan merasîmê xelatdayîşî dest pê kerd. Xelatê Mansîyonî bi kayê "Dîno" Mesut Arîfî rê ame dayene. Xelata Arîfî kaybaze Rezan Kaya daye. Xelata hîrêyinîye bi kayê "Heyran ka em jî hinekî sîyaset bikin" Ehmed Bîlgeyî girewte. Xelata Bîlge rêjîsor Ferhad Feqî pêşkêş kerd.
Xelata dîyinîye bi kayê "Sîyabend" Berat Şahîn Beyogluyî rê ameye dayene. Serekîya Daîreya Kultur, Huner û Karanê Komelkî Zeynep Yaş ke xelat da Beyogluyî, bal ante ser o ke Evdirehîm Rehmî Hekarî bi cehdanê girdan mîrasêko muhîm verdayo xo dima.
Xelata yewinîye zî bi kayê "Kela Dimdimê" Îbrahîm Kazimîyî rê ameye dayene. Xelate nameye Kazimîyî ser o, Beyan Behmanîyî destê Hemsereka Pêroyîye ya Partîya Herêman a Demokratîk (DBP) Çîgdeme Kilicgun Ucarî ra girewte.
