Hemşaredara Şaredarîya Amedî ya Şaristanê Girdî Serra Bucak, xebatkarê cinîyan ê ke Serekîya Daîreya Xizmetanê Cinî û Keyeyî de xebitîyenê, înan reyde ameye têhet û va: "Ma bi rengê xo, bi nasnameyê xo yê cinîbîyayîşî cehd kenê ke rayberîyanê herêmkî de ca bigîrê û nê şaristanî rasta bikerê şaristanê cinîyan."
Têhetameyîşê xebatkaran ke hetê Şaredarîya Şaristanê Girdî ra seba nirxnayîşê şertanê xebate û waştişê personelan, plankerdişê gamanê seba çarebîyayîşî û tesbîtkerdişê xerîteya rayîrî ya prosesê ameyoxî yenê organîzekerdene, dewam kenê. Na çarçewa de têhetameyîşî de ke Salona Kombîyayîşî ya Meclîsê Şaredarîye de ame kerdene, Hemşaredare Serra Bucak reyde Endamê Meclîsê DBB’yî Emra Dogan û Hayat Ozmez, Sereka Daîreya Xizmetanê Cinî û Keyeyî Ozden Gurbuz Sumer û xebatkarê cinî beşdar bîyî.
Hemşaredare Bucak: Ma pîya awan kerd
Hemşaredare Bucak ke kombîyayîşî de qisey kerd, destnîşan kerd ke aye demêko dergo waştêne bi xebatkaranê Daîreya Xizmetanê Cinî û Keyeyî reyde bi taybetî bêro têhet û va ke 20 aşmê vîyarteyî prosesêko zehmet bîyî la bi hêvîye bîyî. Hemşaredare Bucak va: "Ma tim cehd kerd ke weş bibo, weşêr bibo. Ma pîya awan kerd, têkilî û fikrê xo newe kerdî. Dostê ma yê ke ameyî îhrackerdene newe ra mîyanê ma de yo, no parçeyêkê muhîm ê nê prosesî bî."
'Ma cehd kenê ke şaristanî bivurnê'
Hemşaredare Bucak ke bal ante tahrîbatî ser o ke demê qeyûmî de virazîyayo, bal ante ser o ke no aqil şarî ra dûrî yo. Hemşaredare Bucak va: "Ma bi rengê xo, bi nasnameyê xo yê cinîbîyayîşî cehd kenê ke rayberîyanê herêmkî de ca bigîrê û nê şaristanî bi rastî bikerê şaristanê cinîyan."
'Berpirsîyarîya ma çend qat zêde bîye'
Hemşaredare Bucak ard vîrardene ke Amed Projeyê Şaristananê Dostê Cinîyan ê Fonê Nifûsê Dinya yê Netewanê Yewbîyayeyan de ca gêno û şaredarîyanê şaristananê girdan ra yew a ke sey şaristanê cinîyan îlan bîya û destnîşan kerd ke na rewşe berpirsîyarîyan zêde kena. Hemşaredare Bucak îfade kerd ke ganî xebatê hîrê serranê ameyoxî bi nê perspektîfî bêrê plankerdene.
Cinîyan waştişê xo îfade kerd
Xebatkaranê cinîyan ke kombîyayîşî de qisey kerd, derheqê bicaardişê newekerdişî de ke do bi destê cinîyan bibo, emniyetîkerdişê awanîyanê metrûkan, kêmanîyê teknîkî, keyeyê starbîyayîşê cinîyan, têkoşînê vera girêdayîşê madeyan û waştişê qursan de, fikr û pêşnîyazê xo îfade kerdî.
