Şaredarîya Amedî ya Şaristanê Girdî, 4 nêweşxaneyanê şaristanî û verê Merkezê Etudî yê Akademîya Surî de Çeşmeyê Îkramî ronayo û rojanê hewteyî de her roje 1.900 kesî tira şorba şimenê.

Şaredarîya Şaristanê Girdî, xebatanê piştgirîya komelkî seba hewcedarîyanê bingehîn ê şarê xo dewam kena. Na çarçewa de hetê Serekîya Daîreya Xizmetanê Komelkî ra bi Çeşmeyê Îkramî ke 5 cayanê cîyayan ê şaristanî de ronayîyî, her sere sibayî şorbaya germe yena vilakerdene.

Şorbeya ke sere sibayî şertanê hîjyenîkan de aşxaneyê Serekîya Daîreya Xizmetanê Komelkî de yena hazirkerdene, bi Çeşmayanê Îkramî ke verê Polîklînîkê Nêweşxaneyanê Unîversîteya Dîcleyî, Nêweşxaneyê Perwerde û Cigêrayîşî yê Gazî Yaşargîl yê Amedî, Nêweşxaneyê Dewlete yê Selaheddîn Eyyubî, Nêweşxaneyê Zayîşî û Domanan û Merkezê Etudî yê Akademîya Surî de ronayîyê, yena vilakerdene. Rojanê hewteyî de her roje bi pêroyî 1.900 kesî tira şorba şimenê.

Zimistanî şorbe, hamnanî lîmonata

Şaredarîya Şaristanê Girdî, tetbîqê Çeşmeyê Îkramî goreyê mersîmanê serre dewam kena. Çeşmeyan de ke aşmanê hamnanî de lîmonata yena dayene, aşmanê zimistanî de zî şorbaya germe yena vilakerdene.

Şar xizmetî ra memnun o 

Şarê Amedî ra Fethî Kaynarî ke îfade kerd ke şorbadayîşî ra memnun o, destnîşan kerd ke xizmet bi taybetî verê nêweşxaneyan de hewcedarîyêka muhîm a û va: "Seba ke lajê mi nêweş o ez ameya nêweşxane. Mi dî ke Şaredarîya Şaristanê Girdî tîya şorba vila kena. N tetbîq zafê nêweşxaneyanê Amedî de est o. Ma nê xizmetan ra memnun ê."

Halîl Cîhangîrî ke va ke o seba zîyaretê nêweşî Batman ra ameyo, waşt ke tetbîq vila bibo. Cîhangîrî va: "Serê sibayî seetan verênan ra xeylê kesê ke teber ra yenê, est ê. Hewa serd o. Tîya şarî rê dayîşê şorbeya germe xizmetêko zaf weş o. Ma wazênê ke tetbîqê sey nînan her ca de bibê nimûne."