Mudîrîya Pêroyî ya DÎSKÎ ya Şaredarîya Amedî ya Şaristanê Girdî, problemê ke Taxa Eyntirtî ya qezaya Gêlî de resîyayîşê awa şimitişî zehmet kerdêne, bi xeta awa şimitişî ya neweye ya 3 hezar metreyan çareser kerdî.

Mudîrîya Pêroyî ya Îdareyê Awe û Kanalîzasyonê Amedî (DÎSKÎ), seba çarekerdişê problêmanê ke Taxa Eyntirtî ya qezaya Gêlî de ferqê kotî û bînawanîya kehene ra vejîyenê û resîyayîşê awe ser o tesîr kenê, xebatêka hîraye kerde. Bi temambîyayîşê xeta awa şimitişî ya neweye ke bi pêroyî 3 hezar metre ya, 35 keyeyanê taxe rê awa şimitişî ya bêvindertene û bîweşîye ameye temînkerdene. Bi no hewa resayîşê nêzdîyê 200 hemşerîyan ê awe ame garantîkerdene.

'Awa nikayêne bêvindertene resena taxe'

Mudîrê Şûbeyê Gêlî yê DÎSKÎ Cenk Yaşarî ke derheqê xebatan de agahî da, destnîşan kerd ke xebate bi serkewtişî temam bîye û va: "Ma problêmê awa şimitişî yê Taxa Eyntirtî ke demêko derg ra nat dewam kerdêne, bi şeklêko temam çareser kerd. Ferqê kotî û kêmanîya bînawanî ra hemşerîyê ma resîyayîşê awe de tenganîyêko cîdî antêne. Ma ekîbanê xo reyde pîya saha de xebatêka girde û plankerde kerde. Bi aktîfkerdişê xeta neweye şarê taxe nika resênê awe bêvindertene. Nika ma kontrolanê xo yê peyênan kenê, badê temambîyayîşê nê kontrolan do awa şebekeyî bêro dayene."