Şaredarîya Amedî ya Şaristanê Girdî, nameyê muhîman ê muzîkê Kurdan ra Eyşe Şan serra 29. ya wefatê xo de bi programêko hîra yê di rojan ke tede tîyatro, panel û konser est ê, yad kena.

Programê yadkerdişî de roja yewine de, kayê tîyatroyî yê bi nameyê "Ez Eyşe Şan" ke Berfîne Zenderlîoglu sahne kerd û parçeyê cuya Şane pêşkêş keno, temaşekerdoxan reyde ame têhet.

Nîşandayîşo ke Salona Kulturî yê Alî Emîrî de ame kerdene, Hemşaredara Şaredarîya Amedî ya Şaristanê Girdî Serra Bucak, Verfeka MEclîsê Şaredarîya Amedî ya Şaristanê Girdîya Meclîsî Demete Ceylan, keyeyê Eyşe Şan û xeylê şar temaşe kerd.

Badê nîşandayîşî Bucake ke bi dayîşê gulan sipasîya Zenderlîoglu kerde, destnîşan kerd ke salona ke nêzdîyê 9 serran girewte mendê û bîyê xirabe, badê tadîlatî reya yewine perdeyê xo akerdî.

Programê yadkerdişî do roja xo ya dîyine de zî dewam bikero.

18ê Kanûne Çarşeme saete 13.00î de, serê gorê Eyşe Şan ê Goristanê Yenîkoyî de merasîmê yadkerdişî do bêro kerdene. Eynî roje saete 18.00î de Salona Kulturî ya Alî Emîrî de panelo bi nameyê "Cuya Eyşe Şane ya Muzîkî " do bêro organîzekerdene.