Kongreya Federasyonê Cigêrayîşê Îslamî yê Mezopotamya Virazîyaye.

Hemşaredarê Şaredarîya Amedî ya Şaristanê Girdî Dogan Hatun beşdarê Kongreya Federasyonê Cigêrayîşê Îslamî yê Mezopotamya ya Asayî ya 1. bî û nirxnayîşî kerdî.

Kongre de Hemserekê Pêroyî yê DEM Partî û DBPyî, hemşaredarê qezayan û temsîlkarê partîyanê sîyasîyan û dezgehanê komelkî beşdar bîyî.

Hemşaredarê ma Hatunî qiseykerdişê xo de bi nimûneyê tarîxê îslamîyetî û Wesîqeya Medîne ra behsê muhîmîya adaletî û kulturê ciwîyayîşê pîyayî kerd û bale ante ser ke eslê îslamîyetî de xeta xoverdayîşî yê vera zulmî est a.

Hatunî vat ke ewro zî erdanê ma de şarê ke seba ziwanê xo, erdê xo û awa xo têkoşîn kenê, eynî cigêrayîşê adaletî mîyan de yê: "Ma wazenê ke erdanê xo de heme şarê Rojhelatê Mîyanênî azad, aramîye mîyan de û bi aştîye pîya biciwîyê. Erdê ma dewlemend o, awe ma vêşî ya; ma seba heme şaran dewaya aştîye, azadîye û seypêyîye kenê."