Ekîbê Şaredarîya Şaristanê Girdî ya Amedî, merkezê şaristanî de ke vewre tesîrdar a, xebatanê soleeştiş û ritişê vewre dewam kenê.

Dîyarbekirî de vewra ke saetanê serê sibayî de dest pêkerd, tesîrê xo dewam kena. Ekîbê Serekîya Daîreya Viraştiş, Miqate û Tamîrê Rayîran, seranserê şaristanî de vera vewre û cemedî waran ra yê.

Qezayanê Baglar, Sûr, Yenîşehîr û Kayapinarî de arterê serekeyî û rayîrê ke zaf yenê xebitnayene, tede xebatê soleeştişî bêvindertene dewam kenê. Ekîbî, bi amancê temînkerdişê emnîyetê şofor û peyeyan, bi taybetî çatrayîr, qîyame û vîyartgehê pirdan de mudaxeleyê verênîgirewtoxî kenê.

Ekîbî seranserê şaristanî de xebitîyenê

Ekîbê ke Serekîya Daîreya Viraştiş, Miqate û Tamîrê Rayîran 6 şantîyeyanê cîyayan ê qezayanê dewan de xebitênê, xebatê ke vera rewşanê neweşan ê muhtemelan dest pêkerd, dewam kenê. Seba ke res nêvindero, xebatê ritişê vewre, soleeştişî û akerdişê rayîran yenê kerdene.

Ekîbê ke binê Serekîya Daîreya Pawitişê Cugehî û Kontrolî û Serekîya Daîreya Park û Baxçeyan de yê, ey zî peyarayîr û parkan de xebatê pakkerdişê vewre kenê.

Hişyarîya lastîkê zimistanî

Şaredarîya Şaristanê Girdî ya Dîyarbekirî, semedê vewra ke seranserê şaristanî de tesîrdar a, hemwelatî hişyar kerdî. Îzahatî de ke ame dayene, ame waştene ke bi wesayîtê ke lastîkê zimistanî çin ê û seba şertanê vewre mînasib nîyê, nêkewê trafîkî. îzahatî de, bi amancê vernîgirewtişê talûkeyanê îhtîmalan û temînkerdişê emnîyetê trafîkî, bale ame antene muhîmîye ser ke heta ke mecbûr nêbê wesayîtê komresî bêrê tercîhkerdene. Ame îfadekerdene ke ekîbê Şaredarîya Şaristanê Girdî seranserê şaristanî de waran ra wezîfe ser o yê, û ame vengdayene ke seba emnîyetê gan û malê hemwelatîyan tedbîrê ke ameyî girewtene, bêrê pawitene.