Hemşaredare Serra Bucak kombîyayîşê Meclîsê Şaredarîya Amedî ya Şaristanê Girdî de qisey kerd û hêrişê ke Helebî de qewmîyenê şermizar kerdî û va "Ma hêvîdar ê ke proses ver bi rayîrêko demokratîk, aştîyane û çarekerdişî şêro."

Roniştişo yewin ê kombîyayîşê adetî yê aşma çeleyî yê Meclîsê Şaredarîya Amedî ya Şaristanê Girdî, awanîya xizmetî ya şaredarîye de ame viraştene. Kombîyayîşî de ke Hemşaredara Şaredarîya Şaristanê Girdî Serra Bucak serekîye kerde, endemanê meclîsî beşdar bîyî.

Hemşaredare Bucak ke akerdişê kombîyayîşe de qisey kerd, bale ante averşîyayîşanê Rojhelatê Mîyanênî ser o, êrîşê ke hewteyêk o şaristanê Helebê Sûrîye de vera kurdan qewmîyenê rexne kerd û va ke qirkerdişo ke qewmîyeno, tersnok o.

Hemşaredare Bucak qirkerdişê ke Helebî de qewmîyeno şermizar kerd û wina va: "Ma hêvîdar ê ke aqilê demokratîk, aqilê cuya hempare; aqilê awankerdişê Tirkîyêka pîyaye bi aştîye, bi rehetî, Tirkîyêka ke bena demokratîke, bi averşîyayîş ke Rojhelatê Mîyanênî de qewmîyenê û prosesê çarekerdişî ke tîya de dewam keno, meseleyêka wina ne bêro qurbandayene ne zî bê ucayî çarekerdiş bêro fikirîyayene."

'Çarekerdişê ucayî do tîya ser o zî tesîr bikero'

Hemşaredare Bucak qiseya xo wina temam kerd: "Raştîye de tîya de wexto ke ma derheqê prosesê demokratîkbîyayîşî û çarekerdişê qisey kenê, ma derheqê çarekerdişêko bê ucayî qisey nêkenê. Şarê ma yê ucayî, way û birayê ma yê; miletê kurd ê ke ma qederê xo pare kenê. Tena ey zî nîyê. Sûrîye de awanîya zafhetî est a. Elewî est ê, Dûrzî est ê, Kurd est ê, Erebê Sûnnî est ê. Ma naye teqez bê prosesê çarekerdişê tîyayî nêfikirîyenê. Ne hevalê ma yê ke tîya sîyaset kenê, wina fikirîyenê ne zî ma ganî wina bifikirîyê. Ma hêvîdar ê ke no proses ver bi rayîrêko pozîtîf û aştîyane, ver bi prosesê çarekerdişî şêro. Prosesê çarekerdişî yê ucayî do prosesê çarekerdişî yê tîya ser o zî eyînî û aştîyane tesîr bikero."

Badê qiseykerdişê Hemşaredare Bucakî, kombîyayîşê Meclîsî de babetê rojdemî ameyî qiseykerdene.