Şaredarîya Şaristanê Girdî, 6 qezayan de ke vewra girse tesîrdar a, di rojanê peyênan de 319 kîlometre rayîrê taxanê dewan seba resî akerd.

Kordînasyonê Têkoşînê Vera Vewre ke bi rayberîya Şaredarîya Şaristanê Girdî, bi beşdarîya şaredarîyanê qezayan ame awankerdene û xebatanê xo yê arterê serekeyî, waranê roniştişî û dormeyê nêweşxaneyan ê merkezê şaristanî de dewam kena. Ekîbê Serekîya Daîreya Viraştiş, Miqate û Tamîrê Rayîran zî rayîrê taxanê dewan de mesaî kenê.

Na çarçewa de wexto ke rayîrê taxanê dewan ê 11 qezayan abîyî, 6 qezayanê herêmanê koyan ra bi xebatanê ke di rojanê peyênan de şew-roje ameyî ramitene, bi seyan kîlometre rayîr vewre ra ame pakkerdene.

6 qezayan de 319 km rayîr abî 

Çarçewaya xebatanê têkoşînê vera vewre yê di rojanê peyênan de Pasûr de 105 kîlometre, Çêrmûg de 65 kîlometre, Şankûş de 50 kîlometre, Erxenî de 40 kîlometre, Licê de 41,3 kîlometre û Hêni de 18 kîlometre; bi pêroyî 319,3 kîlometre rayîrê taxanê dewan abî.

Waştişê lezabezî yenê caardene

Bi tesîrdarbîyayîşê vewre bi taybetî qezayanê vakûrê Amedî de, ekîbê girêdayeyê Serekîya Daîreya Viraştiş, Miqate û Tamîrê Rayîran û şaredarîyanê qezayan, goreyê waştişanê lezabezan rayîrê taxan ke newe ra girêdîyayî lez mudaxele kenê. Ekîbî, wexto ke resayîşê ambûlansan temîn kenê, wesayîtê ke rayîran ra asê mendî zî bi makîneyanê xebate xelas kenê.

Ekîbî qezayan de amade yê

Yeno tehmînkerdene ke varişî heta saetanê nêmroje yê roja Çarşemeyî tesîrê xo dewam bikerê, Şaredarîya Şaristanê Girdî vera talûkeyanê îhtîmalan tedbîrê xo zêde kerdî. Ekîbê cigêrayîş û xelaskerdişî yê girêdayeyê Serekîya Daîreya Îtfaîyaye, Serekîya Daîreya Karê Afatan û Îdareyê Talûkeyan û Mudîrîya Pêroyî ya Îdareyê Awe û Kanalîzasyonê Amedî (DÎSKÎ); qezayanê Licê, Pasûr, Çêrmûg û Erxenî de ke îqazê kewtişê aşîtî ame dayene, amade yê.

DBB’yî ra îqazê aşîtî

Şaredarîya Şaristanê Girdî, hemwelatîyê ke taxanê dewan de ke vewra girse tesîrdar a, ciwîyenê, hişyar kerd ke vera talûkeyê aşîtî baldar bibê. DBB’yî veng da ke heta ke zerrûrî nêbo rayîrê bitalûke nêrê xebitnayene.