Badê tesîrdarbîyayîşê vewre, Kordînasyonê Têkoşînê Vera Vewre ke bi rayberîya Şaredarîya Amedî ya Şaristanê Girdî ame awankerdene, bi amancê ke res nêvindero û emnîyetê hemwelatîyan bêro temînkerdene, seranserê şaristanî de xebatê ritişê vewre, pakkerdişê peyarayîran û soleeştişî saetanê şewe ra da destpêkerdene.

Bi vewra ke 17ê Çeleyî de dest pêkerd û saetanê şewe de tesîrê xo zêde kerd, seranserê şaristanî kerd sipî, xebatê têkoşînê vera vewre ke bi kordînasyonê Şaredarîya Amedî ya Şaristanê Girdî yenê ramitene, bêvindertene dewam kenê. Badê varayîşê ke saetanê şewe de tesîrê xo zêde kerd, ekîbî seba ke res nêvindero, şîyî war.

Heme yewînî waran ra yê

Çarçewaya Kordînasyonê Têkoşînê Vera Vewre de ke bi rayberîya Şaredarîya Şaristanê Girdî ame awankerdene; ekîbê Serekîya Daîreya Pawitişê Cugehî û Kontrolî, Serekîya Daîreya Park û Baxçeyan, Serekîya Daîreya Viraştiş, Miqate û Tamîrê Rayîran û Serekîya Daîreya Karanê Weşîye û şaredarîyê qezayanê Kayapinar, Sûr, Baglar û Yenîşehîrî waran ra wezîfe ser o yê.

Wexto ke bi makîneyanê xebate arteranê serekîyan de xebatê ritişê vewre yenê ramitene, vera cemedî xebatê soleeştişî zî eynî demî de yenê kerdene.

Peyarayîrî û dormeyê nêweşxaneyan yenê pakkerdene

Ekîbî, bi amancê ke hemwelatî biemnîyet resî raî stîfade bikerê peyarayîr û servîyeran de xebata pakkerdişî ya girse ramenê. Bi taybetî dormeyê nêweşxaneyan, peyarayîrê ke hemwelatî zaf xebitnênê, saetanê sibayî yê verênan ra vewre ra yenê pakkerdene û vera cemedî xebatê soleeştişî yenê kerdene.

Kordînasyonê Têkoşînê Vera Vewre, vera îhtîmalê ke vewre ewro zî tesîrê xo dewam bikero, seranserê şaristanî de xebatê têkoşînê vera vewre do dewam bikero.

Çarnayox: Mehmet Olmez