Şaredarîya Amedî ya Şaristanê Girdî, çarçewaya 21ê Sibate Roja Ziwanê Dayîke ya Dinya de konser organîze kerd. 

Perwerdekar û wendekarê Konservutuvarê Şaristanî yê Aram Tîgranî ke hetê Serekîya Daîreya Kultur, Huner û Karanê Komelkîyan ra Merkezê Kongre û Kulturî yê Çand Amedî de ame organîzekerdene, bi kurmancî, kirmanckî, armenkî û suryankî deyîrî wendî. 

Bernameyo ke bi goşdarîya dengbêjan dest pêkerd, bi eleqeyêko gird ame temaşekerdene. Sereka Daîre Zeynep Yaş ke bernameyî de qisey kerd, bale ante muhîmîya Roja Ziwanê Dayîke ser o û qiseyê Aram Tîgranî ardî vîrî: "Aram Tîgranî vatêne 'Eke destê mi de bîyayêne, mi do heme çekanê dinya bihelnayêne û bi asinê înan hacetanê muzîkî biviraştêne. Mi do pê deyîrî biwendêne.' Ewro ma bawer kenê ke ruhê ci tîya de şad o." 

Yaş ke bale ante dewlemendîya tarîxîye û kulturîye ya cografya ser o, va ke "Herra Dîcle û Firatî ewro tîya bi muzîkî veng dana. Ma bi awanîya xo ya zafziwanîye û zafkulturîye nîşan danê ke cuye dewam kena." 

Yaş îfade kerd ke sahne de cagirewtişê ciwanan hêvîdayox o û temennîya xo kerd ke qet ziwanêk binê asîmîlasyonî de nemano û her kes bieşko bi ziwanê xo azad cuya xo dewam bikero.