Hemşaredara şaredarîya Amedî ya Şarsitanê Girdî Serra Bucak û endamê encûmenî beşdarê kombîyayîşê Encûmenan bîyî ke hetê Yewîya Şaredarîyanê Tirkîya (TBB) ra Enqere de ame viraştene.

Verê kombîyayîşî de endamê Encûmenê TBB'yî, serek û îdarekarê şaredarîyanê temsîlkaranê Yewîya Şaristananê Ewropa (Eurocities) û Torra Şaristananê Balkanî yê B40î reyde ameyî têhet.

Kombîyayîşî de hemkarîya mîyanneteweyî û piştîpêdayîşê îdareyanê herêmkîyan ameyî nirxnayene û bale ame antene xurtkerdişê demokrasîya herêmkîye ya Tirkîya, serberzîya huqûqî û pawitişê dezgehanê demokratîkan ser o.