Şaredarîya Amedî ya Şaristanê Girdî çarçewaya 8ê Adare de xebatanê xo heme qezayan de dewam kena.

Serekîya Daîreya Polîtîkayanê Cinîyan, çarçewaya 8ê Adare Roja Cinîyanê Kedkaran a Dinya de qezayanê Çêrmûg û Erxenî de bazaranê taxan de cinîyan reyde ameye têhet û broşurî vila kerdî.

Çalakîya Erxenî de ke Hemşaredare Bîrsen Azak Bayar û endamê ma yê meclîsî zî beşdar bîyî, broşuranê agahdarîye yê ke bi kurmancî, zazakî û tirkî ameyî amadekerdene, cinîyan rê ameyî vilakerdene.

Ekîbê ke her di qezayan de zî bazaranê taxan de cinîyan reyde ameyî têhet, bale ante ke 8ê Adare tena rojêka vîrardişî nîya, roja têkoşînê mîyanneteweyî ya ke tede waştişê seypêyîye û azadîye yeno berzkerdene.