Hemşaredarê Şaredarîya Amedî ya Şaristanê Girdî Serra Bucak û Dogan Hatun şîyî Baxçeyanê Hewselî ke Lîsteya Mîrasê Dinya ya UNESCO de yê û derheqê kapasîteyê berhemardişê berhemanê ke yenê ramitene û potansîyelê herême yê citkarîye de agahî girewtî.

Hemşaredaran ke waştiş û problemê citkaran zî goşdarî kerdî, bale ante ke Baxçeyê Hewselî hem hetê berhemardişî ra hem zî hetê mîrasê xozayî ra warêko muhîm o û bale ante muhîmîya pawitişê herême ser o.

Citkaran îfade kerd ke bi taybetî derheqê îmkananê awedayîşî û bazarê berheman de ke ramenê rastê probleman yenê û piştîdayîş pawenê.

Hemşaredara Şaredarîya Sûrî Fatma Gulan Onkol û ekolojîst Zekî Kanay zî beşdarê zîyaretî bîyî.