Hemşaredara Amedî Serra Bucak, çadirê fitarî ke Parka Koşuyoluyî de ame ronayene, hemwelatîyan reyde ameye têhet.

Hemşaredara Şaredarîya Amedî ya Şarsitanê Girdî Serra Bucak, çadirê fitarî ke Parka Koşuyoluyî de ame ronayene, hemwelatîyan reyde ameye têhet, hem fitarê xo kerd hem zî waştiş û pêşnîyazê înan goşdarî kerdî.

Bucak ke sipasîya xo kerd ekîbanê zabitayî rê ke organîzasyonê fitarî de wezîfe girewt û kedkaranê ke çadirî de xebitîyenê, bale ante muhîmîya piştîpêdayîş û parekerdişî ser o û seba her kesî temenîya roşanêko birehetî kerd.

Hemşaredara Amedî Bucak ra teber Hemverfekê Meclîsî Demet Ceylan û Ayhan Karatekîn û endamê meclîsî zî beşdarê bernameyî bîyî.