Bi piştîdayîşê Yewîya Şaredarîyanê Herêma Başûrê Rojhelatê Anatolîya (GABB) û şaredarîyanê şaristanê girdî û qezayanê merkezî, bi amancê destgirewtişê xebatanê îdareyanê herêmkîyan ê warê ekonomî bi perspektîfêko hempar û newe ra viraştişî goreyê fehmê ekonomîya komunale ya azadîwaze ya cinîyan, ekolojîk û demokratîk, "Komxebata Ekonomîya Cinîyan a Îdareyanê Herêmkîyan; Kooperatîf û Komûnî" ameye organîzekerdene.

Hemşaredara Şaredarîya Amedî ya Şaristanê Girdî Serra Bucak, Hemşaredara GABB'î Neslîhan Şedal, hemşaredarê qezayan, cinîyê ke mudirîyanê polîtîkayanê cinîyan û yewînanê ekonomî yê şaredarîyan de xebitîyenê beşdar bîyî.

Komxebata ke keda cinîyan gêna merkezê xo; eşkerakerdişê keda miqateyî, averşîyayîşê berhemardişî ke bingeyê hewceyîyanê herêmkîyan ser o yo, awankerdişê modelêkê ekonomî ke xoza reyde hemseng o û girêdayîşê bazarî kêmî keno, yeno amanckerdene.