Mabênê Şaredarîya Amedî ya Şaristanê Girdî û Şaredarîya Yatta de ke başûrê şaristanê El Xelîlî (Hebron) yê herêma Çepera Rojawanê Filistînî de ya, protokolê şaristananê wayûbirayî ame îmzakerdene.

Rîyê şertanê şerî ra wezîfedarê Şaredarîya Yatta ke nêeşkayî bêrê şaristanê ma, protokol kombîyayîşê onlîne de ame viraştene.

Kombîyayîşî de hemşaredarê ma Serra Bucak û Dogan Hatun û Şaredarê Yatta Jamîl Awad, Wezîfedarê Departmanê Plankerdişê Stratejîkî Îyad Hammad û endamanê meclîsê Şaredarîya Yatta ca girewt.

Çarçewaya protokolî de ke ame îmzakerdene, mabênê di şaristanan de îdareyê herêmkî ra heta kulturî, ciwanîye ra heta perwerdeyî, ekonomî ra heta plankerdişê şaristanî zaf waran de hemkarîye û parekerdişê agahîye yeno amanckerdene.