Tîyatroyê Şaristanî yê Şaredarîya Amedî ya Şaristanê Girdî, bi "Moraşîn" qiseykerdişanê kurdan ê qedîman ano sahne ser  û hîkayeyêka xurte ke rêça eşqî, xoverdayîş û bedilîyayîşî ya, Festîvala Tîyatroyî ya Mîyanneteweyî ya Amedî ya 11. de ano vernîya temaşekerdoxan.

Tîyatroyê Şaristanî yê Şaredarîya Amedî ya Şaristanê Girdî (DBŞT) ke binê Serekîya Daîreya Kultur, Huner û Karanê Komelkîyan de falîyet keno, bi produksîyonê xo yê neweyî "Moraşîn" amade keno ke bêro vernîya temaşekerdoxan. Kayo ke rejîsorê tîyatroyê Îranî Ghotbedîn Sadeghî nuşto û rejîsorîya ci kerda, çarçewaya Festîvala Tîyatroyî ya Mîyanneteweyî ya Amedî ya 11. de do premîyerê xo bikero. Esero ke do qadroyê teqrîben 50 kesan ê kayker û reqskaran bêro sahnekerdene, bi ziwanê sahneyê xurtî û performansêko heybetin dano hêvîkerdene.

"Moraşîn"ê Sadeghî ke bi kayê "Spîmend"î ke DBŞT’yî reyde sahne kerd, yeno naskerdene, 23ê nîsane de Merkezê Kongre û Kulturî yê Çand Amedî de reya yewine do temaşekerdoxan reyde bêro têhet.

Qadroyê kaykeran

Qadroyê kaykeranê de Nurşen Adîguzel, Yawuz Akkuzu, Nazmî Karaman, Rêzan Kaya, Leyla Batgî, Omer Şahîn, Sena Ozbey, Erhan Mîr, Mesut Erencî, Şehabettîn Dag, Salîh Yildizoz, Şahperî Alphan, Perînaz Delazy, Mehmet Veysî Yoldaş, Eyub Kan, Havva Akçîçek, Şevîn Yel, Sadettîn Înal, Omer Akkan, Halît Aslan, Şîyar Yaşa, Nurcîhan Yilmaz, Gulşen Yaşar û Meryem Turk ca gênê.

Reqskarê Kayanê Tradîsyonan ê KASED’î do performansê sahne de pîya bibê.

Rîtuelê qedîmî

"Moraşîn", sey adapteyêka dramatîke ke destananê kurdan ra "Gencê Xelîl"î ra dest pêkena, yena sahnekerdene. Hîkayeya ke bi cîyakewtişê Genco û Moraşînê sozkerdeyan ê rîyê şer û feqêrîye ra qewmîyeno, Moraşîne seba ke bireso heskerdoxê xo, 40 cinîyanê hevalanê xo reyde bi kincanê camêrdan rayîr kewena. Moraşîne, rayîrê xo de 7 qonaxan ra ke bi rîtuelanê qedîman xemilîyayî, vîyarena.

 

Mehmet Olmez