Şaredarîya Amedî ya Şaristanê Girdî, pêdîyayîşêko manadar ke amanc keno ke mîrasê kulturî gedeyan rê bido musnaye, viraşt.

Serekîya Daîreya Xizmetanê Komelkîyan ke çarçewaya çalakîyanê 15-22ê Nîsane Hewteyê Turîzmî de resnayîşê kulturî gêna merkezê xo, 260 gedeyî dengbêjan reyde ardî têhet.

Gedeyê ke ameyî berdene Keyeyê Dengbêjan, pê kilamanê ke dengbêjan wendî, beşêko muhîm ê kulturê kurdan nas kerd.

Pêdîyayîşo ke warêko tarîxî de ame viraştene, tede wendekaranê dengbêjan reyde pîya govende ameye girewtene.

Gedeyê ke beşdarê çalakîye bîyî, tena dengbêjî goşdarî nêkerdî, eynî wextî de firsend dî ke awanîya tarîxîye ya Amedî nêzdî ra bivînê.