Festîvalê Tîyatroyî yo Mîyanneteweyî yê Amedî yo 11. ke hetê Tîyatroyê Şaristanî yê Şaredarîya Amedî ya Şaristanê Girdî (DBŞT) ra yeno organîzekerdene, dewam keno.

Festîvalê Tîyatroyî yo Mîyanneteweyî yê Amedî yo 11. ke hetê Tîyatroyê Şaristanî yê Şaredarîya Amedî ya Şaristanê Girdî (DBŞT) ra bi temaya "Seba Haştîye Dîyalog" yeno organîzekerdene, roja xo ya 6. de bi çalakîyanê wendiş/krîtîkan û kayanê ke ameyî sahnekerdene dewam kerd. 

Salona Semînerî ya Merkezê Kultur û Kongreyî yê Çand Amedî de çalakîya bi sernameyê "Birînî Heta-Heta Menenê", nuştoxa tîyatroyî Dr. Sivan Ben Yishai û akademîsyenê tîyatroyî Dr. Lazardzig Jan Hendrik ameyî têhet û derheqê haştî, vîr û rîbirîbîyayîşî de qisey kerd. 

Salona Tîyatroyî ya M. Emîn Yalçinkayayî de zî kayê "Şewêka Ke Vîrî Nêbena" ke rejîsorê Helepçeyij Khalat Nawzad Othmanî ci rê rejîsorîye kerda, temaşekaran reyde ame têhet û bi raya çimanê cinîyêka şoreşgere mabênê heyf û edaletî pêkewtişî û vîrî ard sahne ser. 

Performansê di kesan ê bi nameyê "Connecting Bridges" ke rejisor nîjer Sunday Ododoyî sahne kerda zî, bi sahnegerîya mînîmalîste û sembolîke bale ante xo ser. Peynîya nawitişî de, kaykeranê temaşekerî ardî sahne ser û pîya binê sîwana haştîye de govende girewte û salone bi çepikan gulbang da.