Şaredarîya Amedî ya Şaristanê Girdî, bi piştîdayîşê torranê herêmkî û mîyanneteweyîyan, mîyanê tarîxanê 12-16ê gulane de Amed de "Forumê Haştîya Komelkî û Azadîye" do virazo.

Bi şîarê "Pîya" şaristanî de rêzêka çalakîyan ê atolye, panel, konser, gêrayîş û nawitgehî zî do bêrê kerdene.

Çalakîyan de derheqê ‘haştîye do senî biba komelkî?’ de dîyalogî do bêrê ronayene û tecrubeyî do bêrê qiseykerdene.

Hemşaredarê ma Dogan Hatunî ke forumî ra ver veng da, bale ante tecrubeyê cuya pîya ya bi hezaran serran a Amedî ser o û îfade kerd ke seba ke haştî biba komelkî, tecrubeyê şaran do zemînêkê hemparî de bêrê têhetardene û beşdarîya aktîfe ya herkesî nê prosesî de zaf muhîm o.

Hatunî va: "Ma her kesê ke vatişê ci est o û wazeno vengê xo berz bikero, êyê ke wazenê seba haştîye bibê çilkêka awe, dawetê forumî kenê."