Şaredarîya Amedî ya Şaristanê Girdî, dewam kena seba cinîyan û cuya komelkî projeyanê neweyan ê şaredarîya sosyale virazo û cuya şarê xo rehet bikero.

Şaredarîya Amedî ya Şaristanê Girdî, Tesîsê Komelkî yê Fîskayayî yê qezaya Yenîşehîrî ra dima tesîsê xo yo komelkî yo dîyin Parka Wayûbiratî ya Taxa Bagcilarî ya qezaya Baglarî de do akera û warêko cuye yê resayox û biemnîyet seba cinîyan do awan bikero.

Tesîs ke do hetê cinîyan ra bêro xebitnayene, tena sey cayê werd-şimitişî ney, sey warêko zafhetî yo ke heqê komelkîbîyayîş û berhemardişê cinîyan xurt keno, ameyo fikrîyayene. Tesîsê komelkî de pê atolye, warê berhemardişê hemparî û çalakîyê kulturî yeno amanckerdene ke beşdarîya cinîyan a cuya ekonomîk û komelkî bêra teşwîqkerdene.

Hetkarê Serekê Heyetê Îdareyî yê Med Kentsel ve Sosyal Hizmetler Sanayi Ticaret A.Ş. ke binê banê şaredarîye de ya û do tesîsî virazo, Mervan Yildizî dîyar kerd ke yeno amanckerdene tesîs rojane 500 kesan rê xizmet bido. 

Yildizî îfade kerd ke krîzo ekonomîk cinîyan ser o zafêr tesîr keno û va ke qonaxê yewinî de do 50 cinî bêrê îstîhdamkerdene. Yildizî dîyar kerd ke peynîya hezîrane yan zî destpêkê temmuze de tesîs do bêro akerdene.