Roja dîyine ya Pêdîyayîşê Cinî, Kede û Kultur-Hunerî yê Amedî yo 2. ke hetê Şaredarîya Amedî ya Şaristanê Girdî ra Meydanê Berê Koyî de ame organîzekerdene, dewam kerd.

Roja dîyine ya Pêdîyayîşê Cinî, Kede û Kultur-Hunerî yê Amedî yo 2. ke hetê Şaredarîya Amedî ya Şaristanê Girdî ra Meydanê Berê Koyî de ame organîzekerdene, cinîyan hem berhemê keda destanê xo resnayî hemwelatîyan hem zî beşdarê xebatanê atolyeyan ê cîyayan bîyî.

Çalakîye de ke bi pêşengîya Serekîya Daîreya Polîtîkayanê Cinîyan ame bicaardene, xebatê cinîyan ê warê berhemardişî û piştîpêdayîşê înan bale ante.

Pêdîyayîşî de berhemê keda destanê cinîyan 40 standanê cîyayan de ameyî nîşandayene.

Çarçewaya pêdîyayîşî de ke kede, berhemardiş û xebatê kultur-hunerî yê cinîyan ano têhet, atolyeyê cîyayî zî ameyî organîzekerdene.

Cinîyê ke beşdarê çalakîye bîyî, îfade kerd ke pêdîyayîşan de hem keda xo eşkera kerd hem zî tecrubeyê neweyî qezenc kerdî.

Pêdîyayîş bi konserê hunermende Neslihan Edîş ke zaf hemwelatîyê beşdar bîyî û govende girewte qedîyaye.