Festîvalê Tîyatroyî yo Mîyanneteweyî yê Amedî yo 11. ke 11 rojî şaristan bi hunerî dorpêç kerdbî, bi fînalêko biveng perdeyê xo girewt.

Festîvalo ke bi beşdarîya bi seyan hunermendanê 17 dewletan ame viraştene, bi temaşekaranê ke parkî, kuçeyî, sahneyî û waranê tarîxî pirr kerdbî, bî sey şayîyêka kulturî.

Roja fînalî de mêmanan, maçê Amedsporî sînemaya hurdîye ya Merkezê Kultur û Kongreyî yê Çand Amedî de pîya temaşe kerd.

Eynî saetan de kayê "The Letter" yê danîmarayijan reya dîyin ame sahnekerdene û atmosferê pîrozkerdişê Amedsporî festîvalî rê rengêko cîya da. Akerdişê peynîye yê şewe zî bi kayê bi nameyê "Rar" yê tununsijan reyde ame kerdene.

Danskarê ugandayijî ke kayî ra dima warê fuayeyî de bi rîtimê xo yê xurtan temaşekarî zî kerdî parçeyêkê performansî û coşê fînalî resna zîrwe.