Hemşaredarê Bajarê Girdî yê Dîyarbekirî Dogan Hatunî ard ziwan ke qeyyûman zaf zirar dayo warê kultur, ziwan û hunerî. Hîrê awanîyan ra teber çîyêk nêverdayo.

Hemşaredarê Dîyarbekirî yê Bajarê Girdî Dogan Hatun beşdarê programê Weqfa Mezopotamya yê 10 serrî bîyî û Qonaxa Îskerder Paşa de qisey kerd. Serekê weqifî Osman Akyil û xeylê kesê hetê huner, sîyaset û karsazîye ra beşdar bîyî.

Serekê weqifî Osman Akyilî derheqê xebatanê 10 serran yê Weqfa Mezopotamya kerd û ard ziwan ke hetê zanistî, huquqî û weşîye ra komîsyonî ronayî û xebatê termolojî kenê. Akyilî ard ziwan ke xebatê înan zafane derheqê folklor û dîjîtalkerdişê kurdkî de yê.

Qirkerdişê kultur, ziwan û hunerî

Hemşaredar Dogan Hatunî zî wina dewam kerd; "Qeyyûman hetê psîkolojîyî ra bigîrê hetê ziwan, kultur, hunerî û ekonomî ra zî zaf zirar dayo nê şariştanî. Ma deynê înan pêro îzah kerdî. Nê, hetê zirarê huner kultur û ziwanî de zaf bêqîmet ê. Polîtîkayê qeyyûman tena seba talankerdişî nîyo, hetê huner, kultur û ziwanî de zî qirkerdişêk bî. Se ra newayê xebatê înan wina bî.

Her çîyî şaredarî rotî

Hatunî ard ziwan ke qeyyûman çîyêk nêverdayo ke xîzmetê şarî biko û wina dewam kerd, "Awanîya Xîzmetî, Awanîya DISKÎ û Merkezê Kulturî yê Sezaî Karakoçî ra vêşêr çîyêk nêverdoyo û roto.

Ma wayîrê ziwanê xo bivejîyê

Dogan Hatunî ard ziwan ke ganî ma ziwanê xo rê wayîr bivejîyê. Ganî kuçe û bazaran de zî ma ziwanê xo qisey bikê. Hemşaredar Doganî Roşanê Ziwanê Kurdkî pîroz kerd û va ke destê ma ra çi bêro ma do bikê.