DBB'yî Fuarê Turîzmî yê Wanî de ca girewt
Şaredarîya Amedî ya Şaristanê Girdî şaredarîyanê Bismil, Pasûr û Sûrî reyde pîya beşdarê Fuarê Turîzm û Seyahetî yê Wan û Anatolyaya Rojhelatî yê Mîyanneteweyî yê 15. bîye. Şaredarî fuarî de nirxê şaristanî yê tarîxî, kulturî û gastronomîkî dayî şinasnayîş. Stand de dengbêjan deyîrî vatî û tehmê Amedî yê herêmkî zîyaretkerdoxan rê ameyî îkramkerdiş.
Fuarê Turîzm û Seyahetî yê Wan û Anatolyaya Rojhelatî yê Mîyanneteweyî yê 15. Merkezê Fuar û Kongre yê Van Expoyî de dest pêkerd. Fuar mabênê 19-21ê teşrîna peyêne de yeno viraştiş. Amancê fuarî no yo ke nirxê herême yê turîzmî asta neteweyî û mîyanneteweyî de bêrê daşinasnayîş û hemkarîya mabênê şaristanan aver şêro. Şaredarîya Amedî ya Şaristanê Girdî zî bi beşdarîyêka hîraye fuarî de ca girewt.
Mîrasê Amedî yo tarîxî û kulturî ame daşinasnayîş
Standê Şaredarîya Şaristanê Girdî de mîrasê Amedî yo kulturî yê hezaran serran ame daşinasnayîş. Kelaya Amedî û Baxçeyê Hewselî ke Lîsteya Mîrasê Kulturî yê Dinya ya UNESCOyî de ca gênê, stand de ameyî nawitiş. Rotayê turîzmê bawerî û kulturî zî ameyî daşinasnayîş. Beşdaranê fuarî standî rê eleqeyêko gird mojna.
Hemşaredara Şaredarîya Wanî ya Şaristanê Girdî Neslîhane Şedal ke wezîfe ra ameya girewtiş, Hemserekê Wîlayetî yê Wanî yê DEM Partî Gulşene Kurt û Veysî Guneş, hemşaredarê qezayan û endamanê meclîsanê şaredarîyan stand zîyaret kerd. Dengbêjan bi deyîranê xo zîyaretkerdoxî pêşwazî kerdî.
Şaredarîyê qezayan zî beşdar bîyî
Standê Şaredarîya Amedî ya Şaristanê Girdî de sey beşêko taybet Warê Cinîyan ame viraştiş. Şaredarîyanê Bismil, Pasûr û Sûrî zî stand de ca girewt û nirxê qezayanê xo dayî şinasnayîş.
Şaredarîya Pasûrî berhemê gastronomî yê herêmkî û xebatê xo yê kermê birîsimî nawitî. Şaredarîya Bismilî berhemê ke bi keda cinîyan ameyî viraştiş û nirxê herêmkî resnayî zîyaretkerdoxan. Şaredarîya Sûrî zî materyalê daşinasnayîşê turîzmî dayî beşdaran. Nê materyalî awanîya qeza ya tarîxî û kulturî nawnenê.
Tehmê Amedî yê herêmkî ameyî îkramkerdiş
Fuarî de kulturê mitbaxê Amedî yo dewlemend zî ame daşinasnayîş. Mêmanan rê ke standê Şaredarîya Şaristanê Girdî zîyaret kerd, qedayif, penîro munite, kilînca, vamî, şerbet, sucixê gozan û çerezê cîya-cîyayî ameyî îkramkerdiş.
Fuar do heta 21ê teşrîna peyêne zîyaretkerdoxan qebul bikero.
Çarnayox: Mehmet Olmez
