Hevserokên Şaredariya Bajarê Mezin a Amedê Serra Bucak û Dogan Hatun, beşdarî xebata bi navê "Nêzîkatiya Pir-Aliyan di Têkoşîna li Dijî Tîryakê de" bûn, ku ji aliyê Meclîsa Tenduristiyê ya Konseya Bajêr ve hatibû organîzekirin. Hevşaredar Bucak di komxebatê de anî ziman ku ew dikarin di vî warî de xetek têkoşînê ya pir xurt derxin holê.

Xebatên "Nêzîkatiya Pir-Aliyan di Têkoşîna li Dijî Tîryakê de" ku bi pêşengiya Meclîsa Tenduristiyê ya Konseya Bajêr a Amedê hat lidarxistin, li Navenda Çand û Kongreyê ya Çand Amedê dest pê kir. Di xebatê de ku dê heta 1'ê Hezîranê dewam bike, dê gelek mijarên derbarê têkoşîna li dijî tîryakê bi nêzîkatiyeke berfireh bên nirxandin.

Hevserokên Şaredariya Bajarê Mezin a Amedê Serra Bucak û Dogan Hatun, Hevserokên Şaredariya Kayapinarê Berivan Gulşen Sîncar û Cengîz Dundar, Hevserokê Şaredariya Rezanê Sîraç Çelîk, Hevserokê Şaredariya Erxeniyê Şiyar Guldîken, nûnerên rêxistinên civakî yên sivîl ên di warê têkoşîna li dijî tîryakê de xebatan dimeşînin û gelek çalakvan beşdarî vê komxebatê bûn.

"Em xebatên xwe bi 7 meclîsan didomînin"

Di vekirina xebatê de Sekretera Giştî ya Konseya Bajêr Selvi Tunç axivî û destnîşan kir ku ew wek Konseya Bajêr xebatên xwe bi 7 meclîsan didomînin ku 350 saziyên wan hene. Tunç anî ziman ku tiryak rewşeke aloz e ku îro gelek malbat û civakan dixe ber bandor xwe, herwiha destnîşan kir ku di xebatê de ew ê ne tenê zehmetiyan, lê belê çareseriyên başbûnê jî bi hev re biaxêvin.

Hevşaredar Bucak: Bi hevgirtinê pêşniyarên çareseriyê girîng e

Hevseroka Şaredariya Bajarê Mezin Serra Bucak jî bi silavkirina hemû beşdaran dest bi axaftina xwe kir. Hevşaredar Bucak spasiya Meclîsa Tenduristiyê ya Konseya Bajêr û xebatkarên wê kir ku ev beşdar anîne cem hev û got: "Wek hûn jî dizanin, em ê du rojan li vir bi hev re bin da ku pirsgirêkeke pir bi êş biaxivin. Bê guman, dema em vê pirsgirêkê diaxivin, ez dizanim ku li bajêr têkoşîna li dijî tiryakê zehmet e, em bi vê yekê zanin, lê em bi tiştekî din jî zanin; hebûna pirsgirêkê û ji bo çareserkirina wê, anîna wê bi hevgirtin û yekdengiyê, bi pêşniyarên çareseriyê yên hevpar, bi tecrûbeyên pir hêja, pir girîng e."

"Malbat me didin aliyekî û pirsgirêkê ji me re vedibêjin"

Hevşaredar Bucak bal kişand ser tecrûbeyên xwe yên derbarê pirsgirêka tiryakê ya li bajêr de, ku ji 31'ê Adarê ve hatine hilbijartin, û wiha berdewam kir: "Em wek Şaredariya Bajarê Mezin, piştî 8 salan, li ser taybetmendiya şaredariyan a gelbûnê, di mehên havînê de li parkan hevdîtinan li dar dixin, carinan jî hevdîtinên ji nişka ve dikin. Di van hemû hevdîtinan de, dema ku em li ser binesaziyê, veguhestinê û polîtîkayên hawîrdorê yên bajêr biaxêvin, em bi vê êşê re pir rûbirû dimînin. Em dizanin ku di her serdana parka xwe de, ji her 10 malbatên ku me pê re hevdîtin kirin, ji nîvî zêdetir ji me re li ser vê mijarê bi dizî axivîn. Têkoşîna li dijî vê yekê pir girîng e."

"Em dikarin xebatên encamgir derxin holê"

Hevşaredar Bucak anî ziman ku şaredariyên navçeyan di vî warî de xebatan dimeşînin, û Şaredariya Erxeniyê û şaredariyên din ên navçeyan di vî warî de xebatên qadê kirine. Bucak got: "Di vî warî de derket holê ku pêwîst e nexşeyeke rê û rêbazeke hevpar bê diyarkirin. Di nav beşa Serokatiya Xizmetên Civakî de me yekîneya têkoşîna li dijî tiryakê ava kir, yekîneya me niha ji hejmareke kêm hevalan pêk tê, lê potansiyela wê heye ku bi lêkolînên qadê, perwerdehiyan û nêzîkatiyên pir-aliyan bi hemû dînamîkên sivîl ên bajêr re bicive. Piştî van xebatan, em dikarin di têkoşîna li dijî tiryakê de; di demkurt, demnavîn û demdirêj de xebatên encamgir derxin holê. Piştî vê xebatê em dikarin xeteke têkoşînê ya pir xurt derxin holê."

Portreya ku zarokan çêkiribû pêşkêşî hevşaredaran hat kirin

Piştî axaftinan, portreya ku ji aliyê zarokên di Klînîka Psîkiyatriyê ya Oya Bahadir Yuksel a girêdayî Şaredariya Bajarê Mezin a Dîlokê de dihatin dermankirin hatibû çêkirin, pêşkêşî hevserokan hat kirin. Psîkiyatr Dr. Alaattîn Bulut ku diyarî pêşkêş kir, spasiya Şaredariya Bajarê Mezin kir. Hevşaredar Bucak jî bi gotina "Ji bo me diyarîyeke pir bi qîmet e" spasiyên xwe pêşkêş kir.

Rûniştin hatin lidarxistin

Piştî axaftinên vekirinê, Doç. Dr. Omer Kardaş pêşkêşiyek bi sernavê "Nêrîneke Giştî li Ser Tiryakê" pêk anî. Dûv re çalakvanên ji koma Adsiz Narkotîk, di rûniştina "Mînakên Baş di Têkoşîna li Dijî Tiryakê de" de tecrûbe û pratîkên xwe yên têkoşînê parve kirin.

Di rûniştina duyemîn a xebatê de jî dê xebateke atolyeyê li ser aliyên civakî, psîkolojîk û binyadî yên tiryakê bê lidarxistin. Di atolyeyê de dê mijarên wekî "parastina pêşîlêgirtinê, dermankirin û kar" bên nirxandin.

Di roja dawî ya xebatê de jî dê rola civaka sivîl, pisporan û pêşniyarên çareseriyê û têkoşîna kolektîf a ku dê di vî warî de bê meşandin bên nîqaşkirin.