Hevseroka Şaredariya Bajarê Mezin a Amedê Serra Bucak, beşdarî Festîvala 1emîn a Opera û Baleyê ya Anadoluyê bû ku li Qesra Zerzevanê hat lidarxistin.

Serra Bucak, Hevseroka Şaredariya Bajarê Mezin, di çarçoveya Festîvala 1emîn a Opera û Baleyê ya Anadoluyê de, pêşandana Defîleya Zêran a Enstîtuya Gihîştinê ya Amedê û pêşandana "Ji Herêmî Ber Bi Gerdûnî" ya Opera û Baleya Dewletê ya Mersînê (MDOB) ku li Qesra Zerzevanê hatin lidarxistin, temaşe kir.

Konsera bi rejîya bi navê “Ji Herêmî Ber Bi Gerdûnî” ku li qesra di Lîsteya Demkî ya Mîrateya Cîhanî ya UNESCOyê de cih digire, hat pêşkêşkirin, ezmûnek bêhempa pêşkêşî hezkiriyên muzîkê kir.

Pêşkêşvaniya çalakiyê hunermendê şanoyê Volkan Severcan kir. Di temsîla ku di formata konsera bi rejî de hat pêşkêşkirin de, aryayên operayên klasîk, berhemên bestekarên Tirk û performansên baleyê ji aliyê kadroya mezin a 90 kesan a MDOBê ve hatin pêşkêşkirin.

Hevşaredar Bucak, tîma operayê pîroz kir

Hevşaredar Bucak, piştî konserê li ser navê Opera û Baleya Dewletê ya Mersînê, kulîlk pêşkêşî pêşkêşvan Volkan Severcan kir û got: "Li ser navê gelê Amedê, ji bo ku hûn hatin vir û Qesra Zerzevanê hê bêtir efsûnî kirin, spas dikim." Hevşaredar Bucak, tîma operayê ji ber performansên wan pîroz kir.

Di bernameyê de Sekreterê Giştî yê Şaredariya Bajarê Mezin a Amedê Emrullah Gorduk, hevserokên şaredariyên navçeyan, Rektora Zanîngeha Dîcleyê Kamuran Eronat, Alîkarê Walî Aziz Golbaşi, Serokê Odeya Bazirganî û Pîşesaziyê ya Amedê (DTSO) Mehmet Kaya, nûnerên rêxistinên civakî yên sivîl û welatî beşdar bûn.