Şaredariya Bajarê Mezin a Amedê, li gor biryara Wezareta Çandinî û Daristanan a ji ber rewşên nexweşiya şapê ku li seranserê Tirkiyeyê hate dîtin, Bazara Heywanan a Zindî ku hate girtin, derman û dezenfekte kir.

Midûriyeta Karên Tenduristiyê ji bo parastina ewlehiya tenduristiya gel xebatên xwe didomîne. Di çarçoveya xebatan de, li gor biryara Wezareta Çandinî û Daristanan a ji ber bûyerên nexweşiya şapê (serotîpa SAT-2) ku li seranserê Tirkiyeyê tê dîtin, bazarên heywanan ên li seranserê welêt bi demkî hatin girtin. Şaredariya Bajarê Mezin a Amedê, ji bo ku nexweşî bandorê li ser tenduristiya heywanan û gel neke, tedbîr girt û Bazara Heywanan a Zindî ji kirîna heywanan re girt û tê de xebatên derman û dezenfektekirinê pêk anî.

Xebatên dezenfektekirinê ji bo pêşîlêgirtina belavbûna nexweşiyê

Midûriyeta Şaxa Bazara Heywanan a Zindî û Selexaneyan, ji 2'yê Tîrmehê pê ve biryar da ku demkî dest bi rawestandina xebatên xwe bike û ji bo pêşîlêgirtina belavbûna epîdemiyê û herî zû bi awayekî ewle ji nû ve dest bi çalakiyê bike, xebatan da destpêkirin.

Di vê çarçoveyê de, tesîs hat valakirin û hemî qadên vekirî û girtî yên bazarê, axur, padok û avahiyên îdarî, bi dezenfektanên ku ji hêla wezaretê ve hatine pejirandin, paqijkirin û dezenfektekirina berfireh hat kirin. Bi tedbîrên hîjyenê yên zêde re jî, pêvajoyên dezenfektekirinê dê bi geşûgurî û periyodîk werin dubarekirin heya ku metirsiya epîdemiyê ji holê rabe.

"Rêbaza me ya herî bi bandor derzîkirin e"

Veterîner Hekîm Helîn Demîr, ku di Midûriyeta Karên Tenduristiyê de dixebite, derbarê xebatên ku hatine kirin de agahî da û anî ziman ku nexweşiya Şapê ku di nav gel de weke "tebek" an jî "tabak" tê zanîn, dibe sedema zirarên aborî yên mezin. Demîr diyar kir ku nexweşiya Şapê nexweşiyeke virûsgêr e û wiha got: "Ev virûs nexweşiyeke ku bi rêya pîsî, mîz, rûvî û rêya nefesê derbasî heywanan dibe. Zû belav dibe. Têperîna wê pir zû ye. Ji bo parastina ji vê yekê, rêbaza me ya herî bibandor vakslêdan ango derzîkirin e. Di heman demê de, divê di hundirê û derdora gom û axûran de jî dezenfekte were kirin."

"Xebatên me dê bi hûrgilî bidomin"

Demîr, tedbîrên ku wek Şaredariya Bajarê Mezin li hember vê nexweşiya girîng girtine, anî ziman û tekez kir ku dê xebatên xwe bi hûrgilî bidomînin. Demîr got: "Bi xebatên me yên Şaredariya Bajarê Mezin, heywan hatin valakirin. Di xebatên ku me dest pê kirine de, dezenfektanên ku ji hêla Wezareta Çandinî ve hatine pejirandin, hatin bikaranîn. Dezenfektanên herî bi bandor ji bo vê virûsê hatin hilbijartin. Her der hat dezenfektekirin. Di heman demê de, xebateke hîjyenî ya berfireh tê meşandin. Ev xebat dê ji hêla veterînerên me ve bidomin. Ji bo parastina tenduristiya gel û heywanan û piştgiriya hilberînerên me, xebatên me dê bi hûrgilî bidomin."