Lîstikvanên jin ên Şanoya Bajêr a Şaredariya Bajarê Mezin a Amedê (DBŞT), bi lîstika xwe ya nû Jîn (Jinên Azad) dê perda sezonê vekin.

Lîstikvanên jin ên Şanoya Bajêr a Şaredariya Bajarê Mezin a Amedê (DBŞT) ku di bin banê Midûriyeta Çand û Karên Civakî de xebatên xwe didomînin, dê sezona 2025-2026'an bi lîstika şanoya fîzîkî (şanoya tevgerê) ya bi navê "Jîn (Jinên Azad)" vekin. Pêşandana pêşîn a lîstikê ku bi zimanê laş têkoşîna jinan vedibêje, dê roja Duşemê, 1'ê Îlonê, di saet 20.00’an de li Navenda Çand û Kongreyan a Çand Amedê were lidarxistin.

Rêbaza rûbirûbûna şînê bi muzîk û tevgerê tê vegotin

Derhêneriya projeya Jîn (Jinên Azad) ji aliyê Mizgîn Bîlmen ve, koreografiya wê jî ji aliyê Bêrîvan Savgat ve hatiye kirin û dramaturjiya wê jî ji aliyê Berfîn Emektar ve hatiye nivîsandin. Di lîstikê de ku tê de nameya Leyla Zana, helbestên Ebdulla Peşêw û metna Berfîn Emektar cih digirin, azadiya jinan di civaka Kurd de û rêbaza wan a ji bo rûbirûbûna şînê bi muzîk û tevgerê tê vegotin.

"Folklor û dans hewldaneke ji bo azadiyê ye"

Derhêner Mizgîn Bîlmen derbarê lîstika şanoyê de axivî û diyar kir ku ew zêdetirî 10 salan bi awayekî profesyonel dansa folklorê dike û got: "Folklor û dans, di çanda Kurd de ne tenê ji bo rûbirûbûna şînê ye, di heman demê de hewldaneke ji bo azadiyê ye." Bîlmen da zanîn ku wan ev projeya ku bi pêşniyara lîstikvanên jin ên DBŞT'ê dest pê kiriye, bi Bêrîvan Savgat re bi rê ve birine, ku ji bo vegotina ruh û teknîka dansê xwedî pisporiya pêwîst e.

"Me derfet dît ku em di şaristaniya laş de kûr bibin"

Bîlmen diyar kir ku şanoya tevgerê an jî şanoya fîzîkî cureyeke ku ji aliyê Pîna Baush ve hatiye pêşxistin û got: "Pîna Baush ji bo me hunermendeke ecêb e û bi saya şaristanî û nêzîkatiya wê, me jî derfet dît ku em di şaristaniya laş de kûr bibin. Di şanoya fîzîkî de, ya ku mirov çawa tevdigere ne ewqas girîng e, ya ku mirov dixe tevgerê pir girîngtir e."

"Ev rêbaz li ser lêkolîna naverokê ye"

Bîlmen diyar kir ku ev rêbaza ku li Elmanyayê berbelav e, li ser lêkolîna hem di asta laşî û hem jî di asta naverokê de ye û wiha got: "Metnekî pêşwext hatî diyar kirin, koreografiyek hazir an jî tiştekî mîna wê tune ye. Piştî demek kurt rûbirûbûn û lêkolînê, rewşeke bingehîn ji bo min gelek eşkere bû. Li ser dikê, 7 jin rûbirûyî wêranbûnê ne û awayê rûbirûbûna wan bi wê yekê re heye. Tiştek hildiweşe, di dema lîstikê de tê xebitandin û di dawiyê de vediguhere tiştek nû."