Konseya Bajêr a Amedê xebatên xwe berfireh kir û meclîsa xwe ya 9'emîn damezrand. Meclîsa Ziman a Konseya Bajêr, bi civîna xwe ya asayî ya yekem a ku li Navenda Çand û Kongreyê ya Çand Amedê pêk hat, damezrandina xwe ragihand.

Di civînê de ji bilî endamên Konseya Bajêr, endamên Meclîsa Şaredariya Bajarê Mezin a Amedê Hekkî Kaya û Denîz Yalçin, rêxistinên civaka sivîl, nûnerên saziyên ku di warê ziman de xebatan dikin û Seroka Daîreya Çand û Karên Civakî Zeyneb Yaş jî amade bûn.

Piştî axaftinên vekirinê dîwan hat avakirin. Endamê dîwanê Murat Işikirik bal kişand ser mîsyona meclîsê û destnîşan kir ku dê polîtîkayên li gorî avahiya pirzimanî ya bajêr bên hilberandin. Işikirik got: “Ziman çiqas bikeve nava jiyanê, ew ê wisa berdewam bike. Ji ber vê yekê girîng e ku di nava Konseya Bajêr de meclîseke wiha bê avakirin. Hemû hemwelatiyên ku bi Kurmancî, Zazakî, Ermenî û zimanên din diaxivin, dikarin xwe di vê meclîsê de bibînin.”

Beşdaran jî di civînê de nêrîn û pêşniyarên xwe yên derbarê xebat û paşeroja Meclîsa Ziman de anîn ziman. Meclîsa Ziman rêveberiya xwe jî diyar kir. Ji saziyên cuda 13 kes ji bo rêveberiyê hatin hilbijartin. Rêveberî dê di civîna xwe ya 13’ê Îlonê de lijneya rêveberiyê diyar bike.