Hevşaredara Bajarê Mezin a Amedê Serra Bucak, di "Çalakiya Atolyeyê ya Derbarê Astengiyên Bingeha Yekbûyî yên di Têkoşîna Li Dijî Şîdeta Li Ser Jinan de û Lêgerîna Çareseriyan" de axivî, ku ji aliyê Şaredariya Bajarê Mezin a Amedê ve hatibû lidarxistin. Bucak anî ziman ku ew ê piştevaniya jinan û rêxistinbûyînê bi hev re mezin bikin û got, "Em ê civakeke azad û wekhev bi hev re biafirînin."
Rêveberiya Xizmetên Jin û Malbatê ya Şaredariya Bajarê Mezin a Amedê, ji bo mekanîzmayên piştgiriyê yên ji bo jinan xurt bike, pirsgirêkên heyî destnîşan bike, pêşniyarên çareseriyê parve bike û bi hev re stratejiyên bi bandortir pêş bixe, "Çalakiya Atolyeyê ya Derbarê Astengiyên Bingeha Yekbûyî yên di Têkoşîna Li Dijî Şîdeta Li Ser Jinan de û Lêgerîna Çareseriyan" li dar xist. Hevşaredara Bajarê Mezin a Amedê Serra Bucak, Berdevka Meclisa Jinan a DEM Partiyê Halide Turkoglu, Alîkara Sekreterê Giştî Zerîn Turk, Rêvebera Daîreya Xizmetên Jin û Malbatê Ozden Gurbuz Sumer, hevşaredarên navçeyan û nûnerên rêxistinên jinan beşdarî atolyeyê bûn, ku li Salona Konferansê ya Alî Emîrî ya di avahiya şaredariyê de hate lidarxistin.
Hevşaredar Bucak: Em ê bi hev re nîqaş bikin
Hevşaredar Serra Bucak di vekirina atolyeyê de axivî û bal kişand ser girîngiya atolyeyê: “Îro em ê pirsgirêkeke ku gelek dil dişewitîne, pê biaxivin. Em ê bi hev re nîqaş bikin. Mixabin, her çend têkoşîna me ya rêxistinkirî mezin dibe û em rêbazên xwe yên têkoşîna li dijî şîdetê zêde dikin, her çend em li ser her platformê û di her nîqaşê de, ji siyasetê bigire heya rêveberiyên herêmî, giranî didin ser girîngiya têkoşîna li dijî şîdeta li ser jinan û di vî warî de dixebitin jî, îro di rewşeke neyê sekinandinê de ye. Heger em li 10 mehên dawîn ên sala 2025an binêrin, em dizanin ku nêzîkî 350 jin hatine kuştin.”
'Em ê nîqaşa veguheztina tecrûbeyên xwe bo xaleke baştir bikin'
Hevşaredar Bucak destnîşan kir ku zêdebûna kuştinên jinan nayê fikirîn ku ji sîstemê dûr be û wiha pê de çû: "Kuştina jinan bi awayekî wisa zêde pêk tê, bêguman ne dûrî polîtîkayên sîstemê ye. Ev îfadeya aşkere ya polîtîkayên dijminane an bêpolîtîkayên dewletê yên li dijî jinan e. Di heman demê de, mixabin, ew bi parastina faîlên mêr ji hêla mekanîzmayên darazê ve bi heman helwesta dijminane ve pir têkildar e. Em van li ser her platformê bi hev re diaxivin û nîqaş dikin. Em di bingehê de sedemên, pirsgirêkên bingehîn ên ku ji sîstemê û desthilatdariyê derdikevin, dizanin. Lê îro û sibê, tevî hemî zehmetiyên sîstemê, helwesta wê ya dijber û polîtîkayên wê yên dijminane, em, wekî hemî hevalên ku di rêveberiyên herêmî, di warê jinan û mafên jinan de dixebitin, çawa dikarin rêbazên xwe ji nû ve desteber bikin. Em çawa dikarin cûrbecûr rêbazên xwe û tecrûbe, pratîkên xwe yên heyî yên têkildarî şîdeta li ser jinan ber bi xalek çêtir ve bibin. Em ê nîqaşên li ser vê yekê bikin."
'Em ê çawa hevhengî û yekîtiyê biafirînin?'
Hevşaredar Bucak destnîşan kir ku atolye girîng e ji bo her kesê ku di warê têkoşîna li dijî şîdeta li ser jinan de dixebite û ji bo hemî mekanîzmayên herêmî, da ku bi rastî vê mijarê bi hev re desteber bikin, ji nû ve nîqaş bikin, rêbazên nû derxînin holê û çawa van rêbazan bi hev re bikin yek. Hevşaredar Bucak got, “Em ê hem di gotinê de hem jî di kirinê de çawa hevhengî û yekîtiyê biafirînin. Ev jî pir girîng e. Em dizanin ku ev 20 meh in li Amedê û li bajarên din ên herêma me, koordînasyonên jinan, bêguman, polîtîkayên jinan, rêveberiyên jinan, sazî û polîtîkayên jinan ên rêveberiyên me yên herêmî, xebatên xwe yên perwerdeyê bigire heya xebatên têkoşîna li dijî şîdeta li ser jinan bi koordînasyonekê digirin dest. Em ê bi kîjan koordînasyon û hevhengiya di navbera siyaset û herêmê de ji bo damezrandina polîtîkayan û têkoşînê, hîn çêtir û bi berfirehî desteber bikin.”
'Em ê piştevaniya jinan mezin bikin'
Hevşaredar Bucak spasiya hemû jinên ku ji bajarên cuda hatine atolyeyê kir û wiha got: “Em ê rêya xwe û xeta xwe ya têkoşînê dîsa bi hev re xurtir bikin. Em ê civakeke azad û wekhev bi hev re biafirînin. Em ê piştevaniya jinan û rêxistinbûyînê bi hev re mezin bikin û em ê şîdetê bi hev re bidin sekinandin. Di vî warî de ez ji we hemûyan re serkeftinê dixwazim. Hêvî dikim ku atolye bi hêz derbas bibe.”
'Me pêdiviya nirxandineke nû û atolyeyekê dît'
Rêvebera Daîreya Xizmetên Jin û Malbatê Ozden Gurbuz Sumer jî li ser armanca atolyeyê ya ku dê du rojan bidome, nirxandin kir. Sumer destnîşan kir ku xebatên ku di warê polîtîkayên jinan de demeke dirêj e li meydanê dimeşînin, hewcedariyên girîng aşkere kirine û wiha got: “Me dît ku di gelek xebatên me yên di warê têkoşîna li dijî şîdetê de, sînor û kêmasiyên me yên cûrbecûr hene. Şert û mercên civakî yên ku diguherin û vediguherin, di heman demê de di rêbazên şîdetê de jî guhertineke cidî tînin. Me ferq kir ku bi mekanîzmayên 10 sal berê re hewl bidin ku bi îro re mijûl bibin, çiqas dijwar bûye. Ji ber vê yekê, me pêdiviya nirxandinek nû û atolyeyekê dît."
Sumer destnîşan kir ku gelek faktor, ji krîza aborî bigire heya polîtîkayên şer, ji veguherînên di qada ragihandina dîjîtal de bigire heya teknolojiyê, awayên şîdeta li ser jinan diguherînin.
Mijarên ku dê di atolyeyê de bên axaftin
Di atolyeya ku dê du rojan bidome de, dê mijarên wekî: "Pirsgirêkên di Têkoşîna Li Dijî Şîdeta Li Ser Jinan de; Astengiyên Pir-Alî yên Rêxistinên Jinan Pê Re Rû Bi Rû Dimînin, Sedem û Encamên Wan; Ji Pirsgirêkan Ber Bi Çareseriyê: Pêşniyarên Çareseriyê û Stratejiyê yên di Têkoşîna Li Dijî Şîdeta Li Ser Jinan de; Têkoşîna Li Dijî Şîdeta Li Ser Jinan ji Perspektîfa Siyasetê û Pêşniyarên Polîtîkayan" bên bizarvekirin.
Werger: Omer Dilsoz
