Hevşaredarê Bajarê Mezin ê Amedê Dogan Hatun ku beşdarî 1emîn Civîna Asayî ya Meclisa Ciwanan a Konseya Bajêr bû, diyar kir ku di rêveberiyên xwecihî yên bajêr de ciwan her tim xwedî gotin in û destnîşan kir ku divê ciwan pêşengiyê ji civakê re bikin.

1emîn Civîna Asayî ya Meclisa Ciwanan a Konseya Bajarê Amedê, li Navenda Kongre û Çandê ya Çand Amedê hat lidarxistin. Hevşaredarê Bajarê Mezin ê Amedê û Hevserokê Konseya Bajêr Dogan Hatun, Hevberdevkê Meclisa Şaredariya Bajarê Mezin Ayhan Karatekin, nûnerên rêxistinên civaka sivîl û ciwan beşdarî civînê bûn.

Di vekirina civînê de Alîkarê Sekreterê Giştî yê Konseya Bajêr Veysî Kuzu axivî.

Hevşaredar Hatun: Ji sedî 65ê nifûsa bajêr ciwan e

Hevşaredar Dogan Hatun di civînê de axivî, bal kişand ser nifûsa ciwan a bajêr û got:

"Bajarê me jixwe bajarekî ciwan e. Ji sedî 65ê nifûsa bajarê me ciwan e. Di navbera temenê 13-30 salî de nêzîkî 650 hezar nifûsa ciwan heye. Dema ku Konseya Bajarê Amedê nû hat avakirin, di nav 80 konseyên bajaran ên Tirkiyeyê de konseya herî serkeftî Konseya Amedê bû. Di nav komîsyonên wê de jî ya herî serkeftî Meclisa Ciwanan bû. Hevalên ku wê demê di Meclisa Ciwanan de cih digirtin, dê tecrubeyên xwe yên der barê wê yekê de ku di nav 80 bajaran de çawa bûn yekemîn, bi we re parve bikin."

'Ciwan di rêveberiyên xwecihî de xwedî gotin in'

Hevşaredar Hatun destnîşan kir ku ciwan xwedî îrade ne, divê di hemû qadên jiyanê de bizzat xwedî li îradeya xwe derkevin û pêşengiyê ji civakê re bikin. Hatun diyar kir ku di rêveberiyên xwecihî yên Amedê de ciwan her tim xwedî gotin in.

Hevşaredar Hatun bal kişand ser têgeha "Gerontokrasiyê" û wiha axivî:

"Gerontokrasî ew e ku îradeya ciwan di siyasetê de dernakeve pêş û yên herî bi temen xwedî gotin in. Divê em li hemberî vê gerontokrasiyê berteka xwe nîşan bidin. Helbet ev nayê wê wateyê ku em guh nadin mezin û kalên xwe. Wekî îradeyekê gerontokrasî, îradeya ciwanan ji destê ciwanan digire. Ev tiştekî bi pirsgirêk e. Her kes dixwaze li gorî fikir û ramanên xwe bandorê li ser ciwanan bike. Sîstem jî wiha ye, rêxistin jî wiha ne. Lê em wekî siyaseta Kurd dibêjin ku ciwan xwedî îrade ne, divê di hemû qadên jiyanê de bizzat xwedî li îradeya xwe derkevin û pêşengiyê ji civakê re bikin."

'Bi pêşengiya ciwanan bajar her tim bi pêş dikeve'

Hevşaredar Hatun diyar kir ku civakên ku ciwan pêşengiya wan dikin bi pêş dikevin û axaftina xwe wiha bi dawî kir:

"Heke ciwan pêşengiyê ji civakekê re bikin, ew civak her tim bi pêş dikeve. Ew bajar her tim bi pêş dikeve. Ez bawer dikim ku ev meclis dê her tim bi pirsgirêkên nav bajêr û pirsgirêkên ciwanan re eleqedar bibe. Dê van pirsgirêkan bi rêveberiyên xwecihî re parve bike û em ê hemû bi hev re çareser bikin. Me ciwan dest pê kir, em ê ciwan bimeşin û em ê ciwan bi ser bikevin."

Werger: Omer Dilsoz