Şaredariya Bajarê Mezin a Amedê, di çarçoveya 3’yê Kanûnê Roja Astengdaran a Cîhanê de, li sê nuqteyên cuda yên bajêr stant vekirin û balê dikişîne ser mafên welatiyên astengdar.

Armanc: Gihîştina wekhev û çalak

Şaredariya Bajarê Mezin, li gorî armanca xwe ya dabînkirina beşdarbûna wekhev û çalak a kesên astengdar di hemû warên jiyana civakî de, xebatên xwe didomîne.

Serokatiya Daîreya Xizmetên Astengdar û Kalûpîran, bi dirûşma “JIYANKEKE NÛ JI BO ASTENGDARAN PÊKAN E” li cihên sereke yên bajêr stant vekir û broşûrên agahdarî yên der barê mafên astengdaran de belav kirin. 

Stant li van nuqteyan hatin vekirin: 

Kolana Gazî ya Sûrê

Kolana Yaşar Kemal (Ekîncîler) a Yenîşehîrê

Li ber AVM’ya Parka Ceylan Karavîl a li Kayapinarê

Xizmet bi berfirehî hatin ravekirin

Tîmên Şaredariyê, ku Serokê Daîreya Xizmetên Astengdar û Kalûpîran Îsmaîl Degirmencî jî di nav de bû, bi welatiyan re têkilî danîn. Di wesayîtên veguhastina giştî, rawestgeh û cihên kar de, wan agahiyên berfireh der barê xizmetên ku Şaredariya Bajarê Mezin pêşkêşî astengdar û kalûpîran dike, parve kirin.

Tîman, xebatên ku di çarçoveyeke berfireh de tên meşandin wekî perwerde, kar (îstîhdam), xizmetên civakî, piştgiriya psîkososyal, xebatên pevgihîştinê, xizmetên lênêrîna malê û bernameyên piştgiriya aborî rave kirin.

Bal hat kişandin ser girîngiya gihîştina astengdaran a qadên kamûyî û beşdarbûna wan a jiyana çandî û civakî.

Xebatên hişyariyê yên Şaredariya Bajarê Mezin ên ji bo astengdaran dê di tevahiya salê de bidomin.

Werger: Omer Dilsoz