Di koordînasyona Şaredariya Bajarê Mezin a Amedê de, bi armanca xurtkirina xebatên hevpar û hevkariya di qada xizmetên civakî de di navbera şaredariya bajarê mezin û şaredariyên navçeyan de, Civîna Avakirina Tora Koordînasyona Xizmetên Civakî hat lidarxistin.

Civîn di koordînasyona Serokatiya Daîreya Xizmetên Civakî de pêk hat; nûnerên yekîneyên ku di qadên xizmetên civakî, jin, zarok, astengdar, kal û pîr, karesat û piştgiriya psîkososyal de xebatan dimeşînin û nûnerên şaredariyên navçeyan beşdar bûn.

Armanca bingehîn a civînê; şênberkirina avakirina Tora Koordînasyona Xizmetên Civakî ya di navbera şaredariyan de, diyarkirina sernavên xebatên hevpar, mekanîzmayên koordînasyonê û gavên ewil ên çalakiyê yên li hemberî pirsgirêkên civakî û bi taybetî jî rewşên karesat û lezgîn bû.

Xizmetên heyî û hewcedarî hatin parvekirin

Di çarçoveya civînê de, yekîneyên peywendîdar ên şaredariyan derbarê xebatên xizmetên civakî yên ku dimeşînin de pêşkêşî kirin. Di pêşkêşiyan de; qadên xebatê, pirsgirêkên bingehîn ên li qadê, kapasîteya heyî ya di rewşên karesat û krîzê de û bendewariyên ji tora koordînasyonê hatin nirxandin. Li gorî agahiyên hatin parvekirin, hat plankirin ku li seranserê bajêr derbarê rewşa heyî ya xizmetên civakî û qadên hewcedariyê de nexşeyeke xizmetê bê amadekirin.

Di karesat û rewşên lezgîn de tevgera hevpar

Di civînê de modela mudaxeleya hevpar a di navbera şaredariyan de di rewşên karesat û lezgîn de jî hat gotûbêjkirin. Mijarên wekî avakirina hewza xebatkarên pîşeyî û personelan, nêzîkatiya piştgiriya psîkososyal a hevpar û parvekirina rola şaredariyan di dema karesatê de hatin nirxandin. Biryar hat girtin ku ji bo rewşên karesat û krîzê lihevkirineke pêşîn bê dabînkirin û di vê qadê de komên xebatê yên jêrîn werin avakirin.

Pirsgirêkên civakî yên pêşîn wê werin diyarkirin

Di civînê de; xebatên hevpar ên di qadên wekî zarok, şideta li dijî jinê, xizanî û dîtina li derveyî civakê (social exclusion), xizmetên ji bo kal û pîr û astengdaran û her wiha tiryakbûnê hatin nîqaşkirin. Hat biryarkirin ku di van qadan de mijarên hevpar werin diyarkirin û xebatên plankirî werin meşandin.

Di dawiya civînê de hat diyarkirin ku di çarçoveya Tora Koordînasyona Xizmetên Civakî de komên xebatê yên hevpar werin avakirin, gavên çalakiyê yên demkurt werin tespîtkirin û tor di navberên diyarkirî de bicive û xebatên xwe bidomîne.